കായംകുളം: കെ.പി. റോഡിൽ പൊലീസ് സ്റ്റേഷനു സമീപം സ്വകാര്യ ബസ് ബൈക്കിൽ ഇടിച്ച് പത്തു വയസുകാരി മരിച്ചു. ചെട്ടികുളങ്ങര കണ്ണംമംഗലം ശ്രീലകം വീട്ടിൽ ശ്രീകാന്തിന്റെയും വിദ്യയുടെയും മകൾ ശ്രീഭദ്ര (10) ആണ് മരിച്ചത്. ചെട്ടികുളങ്ങര ഈറേഴ വടക്ക് എൽ.പി. സ്കൂളിലെ നാലാം ക്ലാസ് വിദ്യാർത്ഥിനിയായിരുന്നു ശ്രീഭദ്ര. ഞായറാഴ്ച (സെപ്റ്റംബർ 13) വൈകിട്ട് 6.15-ഓടെയാണ് അപകടം.

പിതാവ് ശ്രീകാന്തിനൊപ്പം ബൈക്കിൽ യാത്ര ചെയ്യുകയായിരുന്നു ശ്രീഭദ്ര. പിന്നിൽ അതേ ദിശയിൽ വന്ന ‘ഹരിശ്രീ’ സ്വകാര്യ ബസ് ബൈക്കിൽ ഇടിക്കുകയായിരുന്നു. ആഘാതത്തിൽ ബൈക്ക് മറിഞ്ഞു, ശ്രീഭദ്ര ബസിനടിയിലേക്ക് തെറിച്ചുവീണു. ഹെൽമറ്റ് ധരിച്ചിരുന്നെങ്കിലും അത് തകർന്ന് തലയ്ക്ക് ഗുരുതരമായി പരിക്കേറ്റു.

അപകടശേഷം കുട്ടിയെ താലൂക്ക് ആശുപത്രിയിലും തുടർന്ന് കരീലകുളങ്ങരയിലെ സ്വകാര്യ ആശുപത്രിയിലും പ്രവേശിപ്പിച്ചെങ്കിലും രാത്രി എട്ടുമണിയോടെ മരണം സ്ഥിരീകരിച്ചു. പിതാവ് ശ്രീകാന്തിന് നിസ്സാര പരിക്കുകളേറ്റു.

ബസിന്റെ അമിതവേഗതയും അശ്രദ്ധയുമാണ് അപകടകാരണമെന്ന് നാട്ടുകാർ ആരോപിക്കുന്നു. പോലീസ് കേസെടുത്ത് അന്വേഷണം ആരംഭിച്ചു.

ഇതിന് മൂന്നു ദിവസം മുൻപ്, സെപ്റ്റംബർ 10-ന് കായംകുളം കരീലകുളങ്ങരയ്ക്ക് സമീപം ദേശീയപാത മുറിച്ചുകടക്കുന്നതിനിടെ കാറിടിച്ച് പത്താം ക്ലാസ് വിദ്യാർത്ഥി ആദിത്യൻ (16) മരിച്ചിരുന്നു. ഒരാഴ്ചയ്ക്കുള്ളിൽ കായംകുളത്ത് ഉണ്ടാകുന്ന രണ്ടാമത്തെ വിദ്യാർത്ഥി മരണമാണിത്.