നാഗോയ: ഏഷ്യൻ ഗെയിംസിൽ വനിതകളുടെ വ്യക്തിഗത ട്രാപ്പ് ഷൂട്ടിങ്ങിൽ ചരിത്ര സ്വർണം നേടി ഇന്ത്യയുടെ നീരു ധണ്ഡ. ജപ്പാനിലെ ഐച്ചി-നാഗോയയിൽ സെപ്റ്റംബർ 29 ചൊവ്വാഴ്ച നടന്ന മത്സരത്തിൽ 28 പോയിന്റ് നേടിയാണ് ഹരിയാന സ്വദേശിയായ 26കാരി സ്വർണനേട്ടം സ്വന്തമാക്കിയത്. ഏഷ്യൻ ഗെയിംസിൽ ഷോട്ട്ഗൺ ഇനത്തിൽ വ്യക്തിഗത സ്വർണം നേടുന്ന ആദ്യ ഇന്ത്യൻ വനിതയെന്ന ചരിത്രനേട്ടവും നീരു സ്വന്തമാക്കി.

ഫൈനലിൽ 30 ലക്ഷ്യങ്ങളിൽ 28 എണ്ണവും ഭേദിച്ച താരം, നേരത്തെയുണ്ടായിരുന്ന 24 പോയിന്റിന്റെ ഏഷ്യൻ ഗെയിംസ് റെക്കോർഡും തിരുത്തി. ചൈനയുടെ സൺ യുനോങ് 26 പോയിന്റുമായി വെള്ളിയും കുവൈത്തിന്റെ ഹജർ അബ്ദുൽമാലിക് 21 പോയിന്റുമായി വെങ്കലവും നേടി. 2026 ഏഷ്യൻ ഗെയിംസിൽ ഇന്ത്യ നേടുന്ന അഞ്ചാമത്തെ സ്വർണ മെഡലാണിത്.

വ്യക്തിഗത ഫൈനലിന് മുന്നോടിയായി നടന്ന യോഗ്യതാ മത്സരത്തിൽ ഖത്തറിന്റെ റേ ബാസിലിനൊപ്പം 118 പോയിന്റ് നേടി നീരു ഒന്നാം സ്ഥാനം പങ്കിട്ടിരുന്നു. ഇതോടെ യോഗ്യതാ റൗണ്ടിലും പുതിയ ഏഷ്യൻ ഗെയിംസ് റെക്കോർഡ് സ്ഥാപിച്ചു.

വ്യക്തിഗത സ്വർണത്തിന് മണിക്കൂറുകൾക്ക് മുമ്പ് നടന്ന വനിതകളുടെ ട്രാപ്പ് ടീം ഇനത്തിലും ഇന്ത്യയ്ക്കായി നീരു മെഡൽ നേടിയിരുന്നു. ആശിമ അഹ്ലാവത്ത്, മനീഷ കീർ എന്നിവർക്കൊപ്പം മത്സരിച്ച താരം ടീമിനായി വെള്ളി മെഡൽ സ്വന്തമാക്കി.

നിലവിലെ ദേശീയ ചാമ്പ്യൻ കൂടിയായ നീരുവിന് 2026 ശ്രദ്ധേയമായ നേട്ടങ്ങളുടെ വർഷമാണ്. ജൂലൈയിൽ ഇറ്റലിയിലെ ലോണാറ്റോയിൽ നടന്ന ഐഎസ്എസ്എഫ് ഷോട്ട്ഗൺ ലോകകപ്പിൽ ട്രാപ്പ് ഇനത്തിൽ സ്വർണം നേടിയ ആദ്യ ഇന്ത്യൻ വനിതയെന്ന ചരിത്രവും താരം കുറിച്ചിരുന്നു.

ഏഷ്യൻ ഗെയിംസിലെ സ്വർണനേട്ടത്തിന് പിന്നാലെ രാഷ്ട്രപതി ദ്രൗപദി മുർമു ഉൾപ്പെടെയുള്ള പ്രമുഖർ നീരുവിനെ അഭിനന്ദിച്ചു. ഇന്ത്യൻ കായികരംഗത്ത് പുതിയ മാതൃക സൃഷ്ടിച്ച നേട്ടമാണിതെന്നും യുവതാരങ്ങൾക്ക് പ്രചോദനമാകുമെന്നും അഭിനന്ദന സന്ദേശങ്ങളിൽ വ്യക്തമാക്കി.