ദുബായ്: യുഎഇയുടെ ദേശീയ യാത്രാ റെയിൽ ശൃംഖലയ്ക്ക് ഔദ്യോഗിക തുടക്കമായി ഇത്തിഹാദ് റെയിലിന്റെ ദുബായ് സ്റ്റേഷൻ ഉദ്ഘാടനം ചെയ്തു. ദുബായ് കിരീടാവകാശിയും യുഎഇ ഉപപ്രധാനമന്ത്രിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമും ഷെയ്ഖ് തെയാബ് ബിൻ മുഹമ്മദ് ബിൻ സായിദും ചേർന്നാണ് സ്റ്റേഷൻ ഉദ്ഘാടനം ചെയ്തത്. യുഎഇയുടെ ഗതാഗത അടിസ്ഥാനസൗകര്യ വികസനത്തിലെ സുപ്രധാന നാഴികക്കല്ലായാണ് പദ്ധതിയെ വിലയിരുത്തുന്നത്.

യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ പുതിയ റെയിൽപാതയിലൂടെ അബുദാബിയിൽനിന്ന് ദുബായിലേക്ക് യാത്ര നടത്തി. യാത്രയ്ക്കിടെ റെയിൽവേയുടെ പ്രവർത്തന സംവിധാനങ്ങൾ, യാത്രക്കാർക്കായി ഒരുക്കിയ സൗകര്യങ്ങൾ, ദേശീയ വികസന ലക്ഷ്യങ്ങൾ എന്നിവ അദ്ദേഹം വിലയിരുത്തി. ലോകോത്തര നിലവാരത്തിലുള്ളതും തടസ്സരഹിതവുമായ യാത്രാസേവനങ്ങൾ ഉറപ്പാക്കുന്നതിനുള്ള സംവിധാനങ്ങളും അദ്ദേഹം പരിശോധിച്ചു.

അബുദാബി, ദുബായ്, ഫുജൈറ എന്നിവയെ ബന്ധിപ്പിച്ചുള്ള യാത്രാ ട്രെയിൻ സർവീസുകൾ 2026 സെപ്റ്റംബർ 30ന് ആരംഭിക്കും. രാജ്യത്തെ പ്രധാന നഗരങ്ങൾ തമ്മിലുള്ള യാത്രാസൗകര്യം വർധിപ്പിക്കുന്നതിനൊപ്പം ഗതാഗത മേഖലയിൽ കൂടുതൽ ഏകോപനവും സാമ്പത്തിക വളർച്ചയും ലക്ഷ്യമിട്ടാണ് പദ്ധതി നടപ്പാക്കുന്നത്.

റെയിൽവേ മേഖലയിലെ പ്രാദേശിക വിദഗ്ധരുടെ ശേഷി വികസിപ്പിക്കുന്നതിനും സ്വദേശികൾക്ക് സാങ്കേതിക വൈദഗ്ധ്യം നേടുന്നതിനും പദ്ധതി സഹായകമാകുമെന്ന് അധികൃതർ വ്യക്തമാക്കി. യുഎഇയുടെ ദേശീയ അടിസ്ഥാനസൗകര്യ വികസനത്തിലും സുസ്ഥിര ഗതാഗത സംവിധാനങ്ങളുടെ വളർച്ചയിലും ഇത്തിഹാദ് റെയിൽ നിർണായക പങ്കുവഹിക്കുമെന്നാണ് പ്രതീക്ഷ.