ന്യൂഡൽഹി: കോക്ക്റോച്ച് ജനതാ പാർട്ടി (CJP) നേതൃത്വത്തിൽ ഇന്ത്യയിൽ നടക്കുന്ന പ്രതിഷേധങ്ങളുമായി ബന്ധപ്പെട്ട പൊലീസ് നടപടികളെ വിമർശിച്ച യുഎൻ വിദഗ്ധരുടെ നിലപാട് തള്ളി അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോ. ഇന്ത്യയുടെ ജനാധിപത്യ സംവിധാനത്തിനുള്ളിൽ നടക്കുന്ന ആഭ്യന്തര വിഷയമാണിതെന്നും സ്വന്തം തിരഞ്ഞെടുപ്പുകളും പതിവായ പ്രതിഷേധങ്ങളുമുള്ള രാജ്യമാണ് ഇന്ത്യയെന്നും അദ്ദേഹം പറഞ്ഞു. അമേരിക്കയിലും സമാനമായ പ്രതിഷേധങ്ങൾ നടക്കാറുണ്ടെന്നും ഇന്ത്യയിലെ സംഭവവികാസങ്ങളെ ആഭ്യന്തര ജനാധിപത്യ പ്രക്രിയയുടെ ഭാഗമായി കാണണമെന്നുമാണ് റൂബിയോയുടെ പ്രതികരണം.

ഇന്ത്യയിലെ സന്ദർശനത്തിനിടെ മാധ്യമങ്ങളോട് സംസാരിക്കുകയായിരുന്നു അദ്ദേഹം. യുഎൻ വിദഗ്ധരുടെ വിമർശനം സംബന്ധിച്ച ചോദ്യത്തിന് മറുപടി നൽകവേ, ഇന്ത്യയുടെ ആഭ്യന്തര കാര്യങ്ങളിൽ ബാഹ്യ ഇടപെടലുകൾ ആവശ്യമില്ലെന്ന നിലപാടിനോട് ചേർന്ന പ്രതികരണമാണ് റൂബിയോ നടത്തിയത്.

തിരഞ്ഞെടുപ്പ് കമ്മീഷന്റെ പ്രത്യേക തീവ്ര വോട്ടർ പട്ടിക പരിഷ്കരണമായ സ്പെഷ്യൽ ഇന്റൻസീവ് റിവിഷൻ (SIR), ന്യൂനപക്ഷങ്ങളുടെയും പാർശ്വവൽക്കരിക്കപ്പെട്ട വിഭാഗങ്ങളുടെയും വോട്ടവകാശം നിഷേധിക്കപ്പെടുന്നുവെന്ന ആരോപണം, പരീക്ഷാ ചോദ്യപേപ്പർ ചോർച്ച, തൊഴിലില്ലായ്മ തുടങ്ങിയ വിഷയങ്ങളുയർത്തിയാണ് യുവജനങ്ങളുടെ നേതൃത്വത്തിലുള്ള ആക്ഷേപഹാസ്യ പ്രസ്ഥാനമായ സിജെപി പ്രതിഷേധം നടത്തുന്നത്.

പ്രതിഷേധങ്ങളുടെ ഭാഗമായി ഡൽഹിയിൽ മാത്രം 7,000ത്തിലധികം പേരെ കസ്റ്റഡിയിലെടുത്തതായാണ് റിപ്പോർട്ടുകൾ. പൊലീസ് നടപടികൾക്കെതിരെ വിമർശനങ്ങൾ ഉയർന്നതോടെയാണ് യുഎൻ വിദഗ്ധർ വിഷയത്തിൽ പ്രതികരിച്ചത്.

വോട്ടർ പട്ടിക പരിഷ്കരണവുമായി ബന്ധപ്പെട്ട വിവാദങ്ങൾക്കിടെ മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് യുവജന സംഘടനകളും പ്രതിപക്ഷ പാർട്ടികളും പ്രതിഷേധം ശക്തമാക്കിയിരിക്കുകയാണ്. തിരഞ്ഞെടുപ്പ് പ്രക്രിയയുടെ സുതാര്യതയും വോട്ടവകാശ സംരക്ഷണവും ഉറപ്പാക്കണമെന്നാണ് പ്രതിഷേധക്കാരുടെ ആവശ്യം.

യുഎൻ വിദഗ്ധരുടെ വിമർശനത്തെ ഇന്ത്യ നേരത്തേയും ആഭ്യന്തര കാര്യങ്ങളിലുള്ള അനാവശ്യ ഇടപെടലായി വിശേഷിപ്പിച്ചിരുന്നു. റൂബിയോയുടെ പുതിയ പ്രതികരണം ഈ നിലപാടിനോട് യോജിക്കുന്നതായാണ് വിലയിരുത്തപ്പെടുന്നത്. അതേസമയം, പ്രതിഷേധങ്ങൾ, പൊലീസ് നടപടികൾ, വോട്ടർ പട്ടിക പരിഷ്കരണം എന്നിവയെച്ചൊല്ലിയുള്ള രാഷ്ട്രീയ തർക്കം രാജ്യത്ത് തുടരുകയാണ്.