തിരുവനന്തപുരം: ജിഎൻഎ എനർജിയുമായുള്ള വൈദ്യുതി വാങ്ങൽ കരാർ വിവാദത്തിൽ സർക്കാരിന്റെ തീരുമാനത്തിലും മുഖ്യമന്ത്രിയുടെ ഇടപെടലിലും അതൃപ്തി പരസ്യമാക്കി വൈദ്യുതി മന്ത്രി സണ്ണി ജോസഫ്. ജിഎൻഎയിൽനിന്ന് തൽക്കാലം വൈദ്യുതി വാങ്ങേണ്ടതില്ലെന്ന സർക്കാർ തീരുമാനവും മുഖ്യമന്ത്രി വി.ഡി. സതീശനും കെഎസ്ഇബി ചെയർമാൻ എൻ. പ്രശാന്തും തമ്മിൽ നടത്തിയ കൂടിക്കാഴ്ചയും അറിഞ്ഞത് മാധ്യമവാർത്തകളിലൂടെയാണെന്ന് മന്ത്രി വ്യക്തമാക്കി.
മുഖ്യമന്ത്രിക്ക് ഏത് വകുപ്പിലും ഇടപെടാൻ അധികാരമുണ്ടെന്നും സണ്ണി ജോസഫ് പറഞ്ഞു. എന്നാൽ, വൈദ്യുതി വകുപ്പുമായി ബന്ധപ്പെട്ട നിർണായക തീരുമാനങ്ങൾ മാധ്യമങ്ങളിലൂടെയാണ് അറിഞ്ഞതെന്ന മന്ത്രിയുടെ പ്രതികരണം സർക്കാരിനുള്ളിലെ ഭിന്നത സംബന്ധിച്ച ചർച്ചകൾക്ക് വഴിവെച്ചിട്ടുണ്ട്.
നവംബർ, ഡിസംബർ മാസങ്ങളിൽ സംസ്ഥാനത്ത് വൈദ്യുതി ക്ഷാമമുണ്ടാകില്ലെന്ന് കെഎസ്ഇബിയുടെ പുതിയ ചെയർമാൻ എൻ. പ്രശാന്ത് മുഖ്യമന്ത്രിയെ അറിയിച്ചിരുന്നു. ഇതിന്റെ അടിസ്ഥാനത്തിലാണ് ജിഎൻഎ എനർജിയുമായുള്ള താൽക്കാലിക വൈദ്യുതി വാങ്ങൽ കരാറിൽനിന്ന് പിന്മാറാൻ സർക്കാർ തീരുമാനിച്ചത്.
സുതാര്യമായ ടെൻഡർ നടപടികളോ സംസ്ഥാന വൈദ്യുതി റെഗുലേറ്ററി കമ്മീഷന്റെ മുൻകൂർ അനുമതിയോ ഇല്ലാതെ സ്വകാര്യ കമ്പനിയായ ജിഎൻഎ എനർജിയിൽനിന്ന് 500 മെഗാവാട്ട് വൈദ്യുതി വാങ്ങാനുള്ള നീക്കമാണ് വിവാദമായത്. കുറഞ്ഞ നിരക്കിൽ വൈദ്യുതി ലഭിക്കുമെന്ന വാദവുമായി മുഖ്യമന്ത്രിയുടെ ഓഫീസ് കരാറുമായി മുന്നോട്ടുപോകാൻ താൽപര്യം പ്രകടിപ്പിച്ചപ്പോൾ വൈദ്യുതി മന്ത്രി സണ്ണി ജോസഫും മുൻ കെഎസ്ഇബി ചെയർമാൻ എം.ജി. രാജമാണിക്യവും ഹിമാചൽ പ്രദേശിൽനിന്നുള്ള വൈദ്യുതി വാങ്ങൽ കരാറിനെയാണ് പിന്തുണച്ചിരുന്നത്.
അതേസമയം, സംസ്ഥാനത്ത് കടുത്ത വൈദ്യുതി പ്രതിസന്ധിയുണ്ടാകുമെന്നും പവർകട്ട് ഏർപ്പെടുത്തേണ്ടിവരുമെന്നും മുൻ കെഎസ്ഇബി ചെയർമാൻ എം.ജി. രാജമാണിക്യം റിപ്പോർട്ട് നൽകിയിരുന്നു. ഇത്തരമൊരു സാഹചര്യം നിലനിൽക്കെ വൈദ്യുതി ക്ഷാമമുണ്ടാകില്ലെന്ന പുതിയ ചെയർമാന്റെ വിലയിരുത്തലിലേക്ക് എത്തിയതിന്റെ സാഹചര്യം പരിശോധിക്കാനും മുഖ്യമന്ത്രി നിർദേശം നൽകിയിട്ടുണ്ട്.
ജിഎൻഎ കരാറിൽനിന്നുള്ള പിന്മാറ്റവും മന്ത്രിയുടെ പരസ്യമായ അതൃപ്തിയും കെഎസ്ഇബിയിലെ ഭരണപരമായ തീരുമാനങ്ങളും സർക്കാരിനുള്ളിലെ ഏകോപനവും സംബന്ധിച്ച വിവാദത്തിന് പുതിയ മാനം നൽകിയിരിക്കുകയാണ്.
