ഗ്രാമീണ നഗര തൊഴിലുറപ്പ് പദ്ധതി തൊഴിലാളികൾക്ക് ഓണസമ്മാനം 200 രൂപ വർധിപ്പിച്ചതായി ധനകാര്യ മന്ത്രി കെ. എൻ. ബാലഗോപാൽ അറിയിച്ചു. ഇതോടെ ഇത്തവണ ഓരോ തൊഴിലാളിക്കും 1,200 രൂപ വീതം ലഭിക്കും. കഴിഞ്ഞ വർഷം 1,000 രൂപയായിരുന്നു അനുവദിച്ചിരുന്നത്.

ആകെ 5,25,991 തൊഴിലാളികൾക്കാണ് ആനുകൂല്യം ലഭിക്കുക. ഗ്രാമീണ തൊഴിലുറപ്പ് പദ്ധതി തൊഴിലാളികൾക്ക് ഓണസമ്മാന വിതരണത്തിനായി 51.96 കോടി രൂപയാണ് അനുവദിച്ചിരിക്കുന്നത്. കഴിഞ്ഞ സാമ്പത്തിക വർഷം 100 പ്രവർത്തിദിനം പൂർത്തിയാക്കിയ 5,19,623 പേരാണ് ഇതിന്റെ ഗുണഭോക്താക്കൾ.

സംസ്ഥാന സർക്കാർ നടപ്പാക്കിയിട്ടുള്ള അയ്യൻകാളി നഗര തൊഴിലുറപ്പ് പദ്ധതിയിലും കഴിഞ്ഞ വർഷം 100 പ്രവർത്തിദിനം പൂർത്തിയാക്കിയ 6,368 തൊഴിലാളികൾക്കാണ് ആനുകൂല്യം ലഭിക്കുന്നത്. ഇതിനായി 63.68 ലക്ഷം രൂപയും വകയിരുത്തിയിട്ടുണ്ട്.