വി.ഡി. സതീശൻ
നയിക്കുന്ന യു.ഡി.എഫ് സർക്കാരിന്റെ രൂപീകരണ നടപടികൾക്ക് തുടക്കമായി. മുഖ്യമന്ത്രിയായി തിരഞ്ഞെടുക്കപ്പെട്ട സതീശൻ വ്യാഴാഴ്ച വൈകുന്നേരം തിരുവനന്തപുരത്തെ ലോക് ഭവനിലെത്തി ഗവർണർ രാജേന്ദ്ര വി. അർലേക്കർ മുമ്പാകെ സർക്കാർ രൂപീകരണാവകാശവാദം ഉന്നയിച്ചു. കനത്ത പൊലീസ് സുരക്ഷയോടെയും അനുയായികളുടെ ആവേശകരമായ സ്വീകരണത്തിന്റെയും പശ്ചാത്തലത്തിലുമായിരുന്നു അദ്ദേഹത്തിന്റെ വരവ്.

പോലീസ് വാഹനങ്ങളുടെ അകമ്പടിയോടെയുള്ള വാഹനവ്യൂഹത്തിൽ എത്തിയ സതീശനെ കാണാനായി ലോക് ഭവൻ പരിസരത്ത് നിരവധി കോൺഗ്രസ് പ്രവർത്തകരും മാധ്യമപ്രവർത്തകരും ഒത്തുകൂടി. വെള്ള നിറത്തിലുള്ള എസ്‌.യു.വി വാഹനത്തിൽ എത്തിയ സതീശനെ അനുയായികൾ മുദ്രാവാക്യങ്ങളോടെ വരവേറ്റു. മൊബൈൽ ഫോണുകളിൽ ദൃശ്യങ്ങൾ പകർത്തുന്ന പ്രവർത്തകരെയും കാണാനായി.

2026 നിയമസഭാ തിരഞ്ഞെടുപ്പിൽ കോൺഗ്രസ് നേതൃത്വത്തിലുള്ള യു.ഡി.എഫ് നേടിയ വൻവിജയത്തിന് പിന്നാലെയാണ് ഹൈക്കമാൻഡ് സതീശനെ കോൺഗ്രസ് നിയമസഭാകക്ഷി നേതാവായും മുഖ്യമന്ത്രിസ്ഥാനാർഥിയായും ഔദ്യോഗികമായി പ്രഖ്യാപിച്ചത്. ഇതോടെ ദിവസങ്ങളായി തുടരുന്ന അനിശ്ചിതത്വത്തിനും ചർച്ചകൾക്കും വിരാമമായി.

140 അംഗ നിയമസഭയിൽ യു.ഡി.എഫ് 102 സീറ്റുകൾ നേടി ഭൂരിപക്ഷത്തോടെ അധികാരത്തിലെത്തിയപ്പോൾ, കമ്മ്യൂണിസ്റ്റ് പാർട്ടി ഓഫ് ഇന്ത്യ (മാർക്സിസ്റ്റ്)നേതൃത്വത്തിലുള്ള എൽ.ഡി.എഫിന് 35 സീറ്റുകളിലേക്ക് ചുരുങ്ങേണ്ടിവന്നു. പ്രതിപക്ഷനേതാവായിരിക്കെ ശക്തമായ രാഷ്ട്രീയ പ്രചാരണവും സംഘടനാപരമായ ഏകോപനവും നടത്തി മുന്നണിയെ വിജയത്തിലേക്ക് നയിച്ചതിന്റെ ക്രെഡിറ്റ് സതീശന് ലഭിക്കുന്നു.

ആറുതവണ എം.എൽ.എയായ സതീശൻ ഇതാദ്യമായാണ് മന്ത്രിസ്ഥാനം ഏറ്റെടുക്കാൻ ഒരുങ്ങുന്നത്. മെയ് 18ഓടെ അദ്ദേഹം മുഖ്യമന്ത്രിയായി സത്യപ്രതിജ്ഞ ചെയ്യാനിടയുണ്ടെന്നാണ് കോൺഗ്രസ് വൃത്തങ്ങൾ സൂചിപ്പിക്കുന്നത്. ഇന്ത്യൻ യൂണിയൻ മുസ്ലിം ലീഗ് ഉൾപ്പെടെയുള്ള യു.ഡി.എഫ് ഘടകകക്ഷികളുടെ ശക്തമായ പിന്തുണയും അദ്ദേഹത്തിന് ലഭിച്ചിരുന്നു.

മുഖ്യമന്ത്രി സ്ഥാനാർഥിയായി പ്രഖ്യാപിക്കപ്പെട്ടതിന് പിന്നാലെ സതീശൻ മുതിർന്ന കോൺഗ്രസ് നേതാവ് എ കെ ആൻറണിയെ സന്ദർശിക്കുകയും അനുഗ്രഹം തേടുകയും ചെയ്തു. ശശി തരൂർ,അടൂർ പ്രകാശ്അടക്കമുള്ള നേതാക്കൾ അദ്ദേഹത്തെ അഭിനന്ദിച്ചു.

തൊഴിലില്ലായ്മ, സംസ്ഥാനത്തിന്റെ സാമ്പത്തിക പ്രതിസന്ധി, വികസന പ്രവർത്തനങ്ങൾ എന്നിവയ്ക്ക് മുൻഗണന നൽകുന്ന ഉൾക്കൊള്ളുന്ന ഭരണമാണ് ലക്ഷ്യമെന്ന് സതീശൻ പ്രതികരിച്ചു. പത്ത് വർഷത്തിന് ശേഷം കോൺഗ്രസ് നേതൃത്വത്തിലുള്ള മുന്നണി വീണ്ടും അധികാരത്തിലെത്തുന്നത് കേരള രാഷ്ട്രീയത്തിൽ നിർണായക മാറ്റമായാണ് വിലയിരുത്തപ്പെടുന്നത്.