കോഴിക്കോട് ∙ മൂന്ന് പതിറ്റാണ്ടിലേറെയായി കാത്തിരിക്കുന്ന പൂഴിത്തോട്–പടിഞ്ഞാറത്തറ ബദൽ പാത പദ്ധതിക്ക് പുതുചലനം. കോഴിക്കോട്, വയനാട് ജില്ലകളെ ബന്ധിപ്പിക്കുന്ന ഈ ബദൽ പാതയ്ക്കായി വനത്തിലെ സർവേ നടപടികൾ വ്യാഴാഴ്‌ച തുടങ്ങും. സംസ്ഥാന സർക്കാർ 2024 മാർച്ചിൽ 1.5 കോടി രൂപ അനുവദിച്ചിരുന്നു. ചുരമില്ലാതെ, ദൂരവും ചെലവും കുറയ്ക്കുന്ന മാർഗമാണിത്.

സർവേ ഊരാളുങ്കൽ ലേബർ സൊസൈറ്റിയുടെ നേതൃത്വത്തിൽ നടക്കും. 12 അംഗ സർവേ ടീമിനൊപ്പം 10 വനംവകുപ്പ് ഉദ്യോഗസ്ഥർ, 3 പൊതുമരാമത്ത് വകുപ്പ് ഉദ്യോഗസ്ഥർ, 8 പ്രദേശവാസികൾ എന്നിവരും പങ്കെടുക്കും. വന്യജീവി സങ്കേതം ഉൾപ്പെടുന്നതും മഴക്കെടുതിയും കാരണം നടപടികൾ വൈകിയിരുന്നു. ഈ മാസം 18-നാണ് സർവേ സമയപരിധി അവസാനിക്കുന്നത്. പൂഴിത്തോട് ഭാഗത്ത് നിന്ന് ഫ്ലാഗ് ഓഫ് ചെയ്ത് ഏകദേശം 5 കിലോമീറ്ററിൽ ജിപിഎസ് ഡ്രോൺ സർവേ തുടങ്ങും. സർവേ പൂർത്തിയായാൽ ഉടൻ റോഡിന്‍റെ രൂപരേഖ തയ്യാറാക്കും.

പ്രക്ഷോഭത്തിന്റെ ഫലം

പദ്ധതി മുന്നോട്ട് പോകുന്നത് വർഷങ്ങളായുള്ള കർമ്മസമിതി പ്രക്ഷോഭത്തിന്‍റെ ഫലമാണ്. പേരാമ്പ്ര എം.എൽ.എ. ടി.പി. രാമകൃഷ്ണന്റെ ഇടപെടലോടെയാണ് വനമന്ത്രിയുടെ അനുമതിയോടെ സർവേയ്ക്ക് വഴി തെളിഞ്ഞത്. മലബാർ വന്യജീവി സങ്കേത പരിധിയിലാണ് പ്രധാനമായും സർവേ നടക്കുന്നത്. പൂഴിത്തോട്, രണ്ടാം ചീളി, കരിങ്കണ്ണി, വിലങ്ങൻപാറ, മേലേകരിങ്കണ്ണി (വയനാട്), കാപ്പിക്കളം, പടിഞ്ഞാറത്തറ എന്നീ പ്രദേശങ്ങളിലൂടെയാണ് പാത കടന്നുപോകുന്നത്. ആദിവാസികൾ പണ്ടുമുതൽ യാത്രയ്‌ക്ക് ഉപയോഗിച്ചിരുന്ന പാതയാണിത്. ഭീമൻ വിലങ്ങൻപാറയിൽ ഏകദേശം 200 മീറ്റർ നീളത്തിൽ തുരങ്കം നിർമ്മിച്ചാൽ യാത്ര കൂടുതൽ സുഗമമാകും.

പഴയ തടസങ്ങൾ

1994-ൽ മുഖ്യമന്ത്രി കെ. കരുണാകരൻ തറക്കല്ലിട്ട പദ്ധതിയിൽ 14.285 കിലോമീറ്റർ ഭാഗം പൂർത്തിയാക്കിയെങ്കിലും, 27.225 കിലോമീറ്റർ ദൂരമുള്ള പാതയിൽ 13 കിലോമീറ്റർ വനഭൂമിയുടെ അനുമതി ലഭിക്കാത്തതാണ് പ്രധാന തടസമായത്. കേന്ദ്ര പരിസ്ഥിതി മന്ത്രാലയം 2017-ൽ അനുമതി നിഷേധിച്ചിരുന്നു. പകരമായി 26 ഹെക്ടറിലധികം ഭൂമി വനംവകുപ്പിന് കൈമാറിയിട്ടുണ്ട്. ഇപ്പോഴത്തെ വിലയിരുത്തലിൽ വലിയ വനനാശം ഉണ്ടാകില്ലെന്ന് വ്യക്തമാക്കിയിട്ടുണ്ട്. അന്തിമ സർവേ ഫലമാണ് പദ്ധതിയുടെ ഭാവി തീരുമാനിക്കുക.

കുറഞ്ഞ ചെലവിൽ, കൂടുതൽ സാധ്യതകൾ

വലിയ കയറ്റമില്ലാത്തതിനാൽ, ഈ ബദൽ പാത കുറഞ്ഞ ചെലവിൽ പൂർത്തിയാക്കാമെന്നതാണ് പ്രധാന സവിശേഷത. പെരുവണ്ണാമൂഴി, ബാണാസുര സാഗർ എന്നിവ പോലുള്ള വിനോദസഞ്ചാര കേന്ദ്രങ്ങളിലൂടെ കടന്നുപോകുന്നതിനാൽ ടൂറിസം സാധ്യതയും ഉയരും. ദേശീയപാതയിലെ രാത്രിയാത്രാ വിലക്ക് നിലനിൽക്കുന്നതിനാൽ, ഇത് അനുബന്ധ റൂട്ടായി മാറാനും സാധ്യതയുണ്ട്. പൂഴിത്തോട്–പടിഞ്ഞാറത്തറ–മാനന്തവാടി–കുട്ട–ഗോണിക്കുപ്പ വഴി ബെംഗളൂരുവിലേക്ക് പുതിയ പാത തുറക്കാനും പദ്ധതിക്ക് വഴിയൊരുങ്ങും.

ജാതിമത രാഷ്ട്രീയ ഭേദമില്ലാതെ ഇരുജില്ലകളിലുമുള്ള ജനങ്ങൾ ബദൽ പാതയ്ക്കുവേണ്ടി പ്രക്ഷോഭം തുടരുന്നു. കേന്ദ്രമന്ത്രി നിതിൻ ഗഡ്കരിക്ക് നിവേദനവും ഒപ്പുശേഖരണവും നൽകി ആവശ്യങ്ങൾ ഉന്നയിച്ചിട്ടുണ്ട്.