അരാവല്ലി മലനിരകളുടെ പരിസ്ഥിതിക്ക് അടിയന്തരമായ ഭീഷണി ഒന്നുമില്ലെന്ന് കേന്ദ്ര സർക്കാർ വ്യക്തമാക്കി. അരാവല്ലി മലനിരകൾ രാജ്യത്തിന്റെ സ്വാഭാവിക പൈതൃകവും പരിസ്ഥിതി കവചവുമെന്ന നിലയിൽ നിലനിൽക്കുന്നതിന് തുടർച്ചയായ വനവൽക്കരണ പ്രവർത്തനങ്ങൾ, ഇക്കോ-സെൻസിറ്റീവ് സോൺ വിജ്ഞാപനങ്ങൾ, ഖനനവും നഗരവൽക്കരണവും കർശനമായി നിരീക്ഷിക്കുന്ന സംവിധാനങ്ങൾ നിലവിലുണ്ടെന്ന് പരിസ്ഥിതി, വന, കാലാവസ്ഥാ മാറ്റ മന്ത്രാലയം അറിയിച്ചു.
സുപ്രീം കോടതിയുടെ 100 മീറ്റർ വിധി തെറ്റായി വ്യാഖ്യാനിക്കപ്പെടുകയാണെന്ന് കേന്ദ്ര പരിസ്ഥിതി മന്ത്രി ഭൂപേന്ദ്ര യാദവ് പറഞ്ഞു.

മാധ്യമങ്ങളെ അഭിസംബോധന ചെയ്ത അദ്ദേഹം, അരാവല്ലിയെക്കുറിച്ചുള്ള തെറ്റായ വിവരങ്ങൾ പ്രചരിപ്പിക്കുന്നത് അവസാനിപ്പിക്കണമെന്ന് പൗരന്മാരോട് അഭ്യർത്ഥിച്ചു. അരാവല്ലി മലനിരകളുടെ ആകെ വിസ്തൃതി ഏകദേശം 1.47 ലക്ഷം ചതുരശ്ര കിലോമീറ്ററാണെന്നും, അതിൽ 0.19 ശതമാനം പ്രദേശത്ത് മാത്രമാണ് ഖനനത്തിന് അനുമതി നൽകിയിട്ടുള്ളതെന്നും മന്ത്രി വ്യക്തമാക്കി. സുപ്രീം കോടതി വിധിപ്രകാരം അരാവല്ലി പ്രദേശത്തിന്റെ ഏകദേശം 90 ശതമാനം സംരക്ഷിത മേഖലകളായി ഉൾപ്പെടുത്തിയിട്ടുണ്ടെന്നും, ഇതിൽ യാതൊരു ഇളവുകളും നൽകിയിട്ടില്ലെന്നും അദ്ദേഹം കൂട്ടിച്ചേർത്തു.

ഡൽഹി, ഹരിയാന, രാജസ്ഥാൻ, ഗുജറാത്ത് എന്നീ നാല് സംസ്ഥാനങ്ങളിലായി വ്യാപിച്ചുകിടക്കുന്ന അരാവല്ലി മലനിരകളിൽ ഡൽഹിയിലെ അരാവല്ലി കുന്നുകളിൽ ഖനനം പൂർണമായും നിരോധിച്ചിരിക്കുന്നതായും ഭൂപേന്ദ്ര യാദവ് ചൂണ്ടിക്കാട്ടി. അരാവല്ലി മലനിരകളുടെ നിർവചനവുമായി ബന്ധപ്പെട്ട് പരിസ്ഥിതി മന്ത്രാലയത്തിന്റെ ഒരു സമിതിയുടെ ശുപാർശകൾ സുപ്രീം കോടതി അടുത്തിടെ അംഗീകരിച്ചതായും, അതനുസരിച്ച് 100 മീറ്ററിൽ താഴെ ഉയരമുള്ള കുന്നുകൾ ഇനി പുരാതന അരാവല്ലി മലനിരകളുടെ ഭാഗമായതായി പരിഗണിക്കപ്പെടില്ലെന്നും അദ്ദേഹം അറിയിച്ചു.