തിരുവനന്തപുരം: കെഎസ്ആർടിസി നിലവിൽ ഓടിച്ചു കൊണ്ടിരിക്കുന്ന സ്മാർട്ട് സിറ്റി പദ്ധതിയുടെ ഭാഗമായി വിനിയോഗിക്കുന്ന ഇലക്ട്രിക് ബസുകൾ തിരുവനന്തപുരം കോർപ്പറേഷനു ആവശ്യമാണെങ്കിൽ തിരിച്ചുനൽകാൻ തയ്യാറാണെന്നും, അതിന് പകരം കൂടുതൽ ബസുകൾ കെഎസ്ആർടിസി പുറത്തിറക്കുമെന്നും ഗതാഗത മന്ത്രി കെ.ബി. ഗണേഷ് കുമാർ വ്യക്തമാക്കി.

സ്മാർട്ട് സിറ്റി പദ്ധതിയുടെ ഭാഗമായി നിലവിൽ 113 ഇലക്ട്രിക് ബസുകളാണ് കെഎസ്ആർടിസി സർവീസ് നടത്തുന്നത്. ഇതിന് പുറമേ കെഎസ്ആർടിസിയുടെ സ്വന്തം ഉടമസ്ഥതയിലുള്ള 50 ബസുകളും നഗരത്തിൽ സർവീസ് നടത്തുന്നുണ്ട്. പദ്ധതിയുടെ ധനവിനിമയ ഘടന പ്രകാരം കേന്ദ്ര സർക്കാർ 500 കോടി രൂപയും സംസ്ഥാന സർക്കാർ 500 കോടി രൂപയും സംഭാവന ചെയ്തിട്ടുണ്ട്. തിരുവനന്തപുരം കോർപ്പറേഷന്റെ വിഹിതമായി 135.7 കോടി രൂപയുമാണ് ഉള്ളത്. സംസ്ഥാനത്തിന്റെ ഫണ്ടും കോർപ്പറേഷന്റെ ഫണ്ടും സംസ്ഥാന ഖജനാവിൽ നിന്നുള്ളതായതിനാൽ മൊത്തം തുകയുടെ ഏകദേശം 60 ശതമാനവും സംസ്ഥാന സർക്കാരിന്റെ വിഹിതമാണെന്നും മന്ത്രി ചൂണ്ടിക്കാട്ടി.

താൻ മന്ത്രിയായി ചുമതലയേറ്റപ്പോൾ ഈ ഇലക്ട്രിക് ബസുകൾക്ക് ദിവസേന ലഭിച്ചിരുന്ന വരുമാനം ഏകദേശം 2,500 രൂപ മാത്രമായിരുന്നുവെന്നും, നിലവിൽ അത് 80,000 മുതൽ 90,000 രൂപ വരെ ഉയർന്നിട്ടുണ്ടെന്നും മന്ത്രി പറഞ്ഞു. തിരുവനന്തപുരം നഗരപരിധിക്ക് പുറത്തേക്ക് ബസ് ഓടിക്കരുതെന്ന നിലപാട് പ്രായോഗികമല്ലെന്നും, ബസിൽ കയറുന്നതിൽ നിന്ന് ജനങ്ങളെ തടയാൻ സാധിക്കില്ലെന്നും, യാത്രക്കാരെ ബുദ്ധിമുട്ടിലാക്കുന്ന നടപടികൾ ഉണ്ടാകരുതെന്നും അദ്ദേഹം വ്യക്തമാക്കി.

നിലവിലുള്ള 113 ഇലക്ട്രിക് ബസുകൾക്ക് പകരം 150 ബസുകൾ വരെ കെഎസ്ആർടിസി റോഡിലിറക്കാൻ തയ്യാറാണെന്നും മന്ത്രി അറിയിച്ചു. അതേസമയം, ഇലക്ട്രിക് ബസുകളുടെ പരിപാലനം വളരെ ചെലവേറിയതാണെന്നും, ഓരോ ബസിനും ഏകദേശം ഒരു കോടി രൂപ വില വരുമെന്നും, അഞ്ച് വർഷം കഴിഞ്ഞാൽ ബാറ്ററി മാറ്റേണ്ടിവരുമെന്നും, അതിനായി ഏകദേശം 28 ലക്ഷം രൂപ ചെലവാകുമെന്നും അദ്ദേഹം പറഞ്ഞു.

തിരുവനന്തപുരം കോർപ്പറേഷനു ഈ ബസുകൾ ആവശ്യമാണെങ്കിൽ തിരിച്ചുനൽകാൻ തങ്ങൾക്ക് യാതൊരു മടിയുമില്ലെന്നും, സഹകരണ മനോഭാവത്തോടെ വിഷയത്തിൽ തീരുമാനം എടുക്കുമെന്നും മന്ത്രി കെ.ബി. ഗണേഷ് കുമാർ വ്യക്തമാക്കി.