പാലക്കാട്: തിരുനാവായയിലെ മഹാമഘ മഹോത്സവത്തിൽ പങ്കെടുക്കാനെത്തുന്ന തീർഥാടകർക്കായി വാരാണസിയെയും എറണാകുളം ജങ്ഷനെയും ബന്ധിപ്പിച്ച് ഒരുതവണ മാത്രം ഓടുന്ന പ്രത്യേക ഫെസ്റ്റിവൽ ട്രെയിനുകൾ സർവീസ് നടത്തുമെന്ന് ദക്ഷിണ റെയിൽവേയുടെ പാലക്കാട് ഡിവിഷൻ അറിയിച്ചു.
ട്രെയിൻ നമ്പർ 04358 വാരാണസി–എറണാകുളം ജങ്ഷൻ ഫെസ്റ്റിവൽ സ്പെഷ്യൽ എക്സ്പ്രസ് 2026 ജനുവരി 30-ന് (വെള്ളി) വൈകിട്ട് 4.30-ന് വാരാണസിയിൽ നിന്ന് പുറപ്പെട്ടു ഫെബ്രുവരി 1-ന് (ഞായർ) രാത്രി 10.00-ന് എറണാകുളം ജങ്ഷനിലെത്തും. തിരിച്ചുള്ള ട്രെയിൻ നമ്പർ 04357 എറണാകുളം ജങ്ഷൻ–വാരാണസി ഫെസ്റ്റിവൽ സ്പെഷ്യൽ എക്സ്പ്രസ് ഫെബ്രുവരി 3-ന് (ചൊവ്വ) രാത്രി 8.00-ന് എറണാകുളം ജങ്ഷനിൽ നിന്ന് പുറപ്പെട്ടു ഫെബ്രുവരി 6-ന് (വെള്ളി) പുലർച്ചെ 3.00-ന് വാരാണസിയിലെത്തും. ഇരു സർവീസുകളും ഒരുതവണ മാത്രമാണ് നടത്തുന്നത്.
ഓരോ ട്രെയിനിലും 2 ഫസ്റ്റ് എസി, 2 എസി 2-ടയർ, 3 എസി 3-ടയർ, 6 സ്ലീപ്പർ ക്ലാസ്, 5 ജനറൽ കോച്ചുകൾ ഉണ്ടായിരിക്കും. പാലക്കാട് ഡിവിഷനിൽ പാലക്കാട്, ഒറ്റപ്പാലം സ്റ്റേഷനുകളിൽ ട്രെയിനുകൾക്ക് സ്റ്റോപ്പുണ്ടാകും.
259 വർഷങ്ങൾക്ക് ശേഷം ഭാരതപ്പുഴയുടെ തീരത്ത് പുനരുജ്ജീവിപ്പിച്ച മഹാമഘ മഹോത്സവം, കേരളത്തിന്റെ ചരിത്രപ്രസിദ്ധമായ മാമാങ്കത്തെ അനുസ്മരിപ്പിക്കുന്നതും ‘തെക്കൻ കുംഭമേള’ എന്നറിയപ്പെടുന്നതുമായ ഒരു മഹത്തായ സാംസ്കാരിക ഉത്സവമാണ്. 2026 ജനുവരി 19-ന് ആരംഭിച്ച 12 ദിവസത്തെ ആചാര അനുഷ്ഠാനങ്ങളാണ് മഹോത്സവത്തിന്റെ ഭാഗമായി നടക്കുന്നത്.

മറ്റു സ്റ്റോപ്പുകൾ: പ്രയാഗ്‌രാജ് ചേയോകി, മണിക്പൂർ ജങ്ഷൻ, സത്‌ന, ജബൽപൂർ, ഇതാർസി ജങ്ഷൻ, ബെതൂൾ, നാഗ്പൂർ ജങ്ഷൻ, ഹിംഗൻഘട്ട്, ബൽഹർഷ, ബെലമ്പള്ളി, ജമികുണ്ട, വാരംഗൽ, ദോർണകല ജങ്ഷൻ, വിജയവാഡ ജങ്ഷൻ, ടെനാലി ജങ്ഷൻ, ഒംഗോൾ, നെല്ലൂർ, ഗൂഡൂർ ജങ്ഷൻ, പെരമ്പൂർ, കാട്ട്പാടി ജങ്ഷൻ, ജോളാർപെട്ടൈ ജങ്ഷൻ, സേലം ജങ്ഷൻ, ഈറോഡ്, തിരുപ്പൂർ, കോയമ്പത്തൂർ ജങ്ഷൻ, പോടനൂർ ജങ്ഷൻ, തൃശൂർ, ആലുവ.