തൃശൂർ: വിഷുദിനത്തിൽ നടന്ന ദാരുണമായ ബൈക്ക് അപകടത്തിൽ ഇരിങ്ങാലക്കുട സ്വദേശിയായ യുവാവ് മരിച്ചു. ചേലൂർ ചാത്തകുടത്ത് വിജയന്റെ മകൻ സുജീഷ് (37) ആണ് മരിച്ചത്.

കഴിഞ്ഞ ദിവസം രാത്രി പൊറത്തിശ്ശേരി പ്രദേശത്ത് വെച്ചാണ് അപകടം നടന്നത്. നിയന്ത്രണം വിട്ട ബൈക്ക് അപകടത്തിൽപ്പെട്ടതായാണ് പ്രാഥമിക വിവരം. ഗുരുതരമായി പരിക്കേറ്റ സുജീഷിനെ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

വിദേശത്ത് ജോലി ചെയ്തിരുന്ന സുജീഷ് വിഷുവിനോടനുബന്ധിച്ച് ദിവസങ്ങൾക്കുമുമ്പാണ് നാട്ടിലെത്തിയത്. ഉത്സവാഘോഷങ്ങളുടെ വേളയിൽ ഉണ്ടായ ഈ ദാരുണ സംഭവം പ്രദേശവാസികളിൽ ദുഃഖം വിതറി.