പെരുമ്പാവൂർ: വെസ്റ്റ് ബംഗാൾ നിയമസഭാ ഇലക്ഷനിൽ വോട്ട് രേഖപ്പെടുത്തുന്നതിനായി ബംഗാളി തൊഴിലാളികൾ കൂട്ടത്തോടെ നാട്ടിലേക്ക് മടങ്ങിയതോടെ പെരുമ്പാവൂരിലെ വ്യാവസായ മേഖലയിൽ കടുത്ത തൊഴിലാളി ക്ഷാമം അനുഭവപ്പെടുന്നു.
പ്ലൈവുഡ് യൂണിറ്റുകൾ, സോമില്ലുകൾ, തടി മില്ലുകൾ തുടങ്ങി നിരവധി സ്ഥാപനങ്ങളിൽ ജോലി ചെയ്യുന്നവരിൽ ഭൂരിഭാഗവും ബംഗാളികളാണ്. ഇവർ നാട്ടിലേക്ക് മടങ്ങിയതോടെ പല സ്ഥാപനങ്ങളും പ്രവർത്തനം നിലച്ച നിലയിലായി. തൊഴിലാളികളുടെ അഭാവം മൂലം ചില യൂണിറ്റുകൾ അടച്ചിടേണ്ടി വന്നതും മേഖലയിൽ ആശങ്ക വർധിപ്പിച്ചിട്ടുണ്ട്.
റിപ്പോർട്ടുകൾ പ്രകാരം, പെരുമ്പാവൂർ, വെങ്ങോല എന്നിവ ഉൾപ്പെടെയുള്ള പ്രധാന വ്യാവസായ കേന്ദ്രങ്ങളിൽ നിന്ന് അയ്യായിരത്തിലധികം തൊഴിലാളികളാണ് തിരഞ്ഞെടുപ്പിനോടനുബന്ധിച്ച് നാട്ടിലേക്ക് പോയത്. ഇതോടെ വ്യവസായ പ്രവർത്തനങ്ങൾ താളം തെറ്റുകയും, പല സ്ഥലങ്ങളും ഹർത്താൽ ദിനങ്ങളെ ഓർമ്മിപ്പിക്കുന്ന വിധം വിജനമായി മാറുകയും ചെയ്തു.
തൊഴിലാളികളുടെ ഈ കൊഴിഞ്ഞുപോക്ക് ചരക്ക് നീക്കത്തെയും ലോറി ഗതാഗത മേഖലയെയും സാരമായി ബാധിച്ചു. സാധനങ്ങളുടെ ലോഡിംഗും അൺലോഡിംഗും തടസ്സപ്പെട്ടതോടെ വ്യാപാര മേഖലയിൽ നഷ്ടം വർധിക്കുന്നതായി വ്യാപാരികൾ പറയുന്നു.
ഇനിയും കൂടുതൽ തൊഴിലാളികൾ നാട്ടിലേക്ക് പോകാൻ സാധ്യതയുള്ളതിനാൽ അടുത്ത ദിവസങ്ങളിലും പ്രതിസന്ധി തുടരുമെന്നാണ് വ്യവസായികൾ വിലയിരുത്തുന്നത്. തൊഴിലാളി ക്ഷാമം പരിഹരിക്കാൻ അടിയന്തര ഇടപെടലുകൾ ആവശ്യമാണ് എന്ന ആവശ്യം ശക്തമാകുകയാണ്.
