എണ്ണ ഉൽപാദക രാജ്യങ്ങളുടെ കൂട്ടായ്മയായ ഒപെക്+ ജൂൺ മാസത്തേക്കുള്ള ക്രൂഡ് ഓയിൽ ഉൽപ്പാദന ക്വോട്ട ദിനംപ്രതി 1.88 ലക്ഷം ബാരൽ വർധിപ്പിക്കാൻ തീരുമാനിച്ചു. മെയ് ഒന്നിന് യുണൈറ്റഡ് അറബ് എമിറേറ്റ്സ് കൂട്ടായ്മയിൽ നിന്ന് പിന്മാറിയതിന് പിന്നാലെ ക്വോട്ടയിൽ വരുത്തിയ ക്രമീകരണങ്ങൾക്കുശേഷമുള്ള തുടർച്ചയായ മൂന്നാമത്തെ മാസ വർധനവാണിത്.
ഉൽപ്പാദന നിയന്ത്രണങ്ങൾ മൂലം സ്വന്തം ശേഷിക്കനുസരിച്ച് എണ്ണ ഉൽപ്പാദനം വർധിപ്പിക്കാൻ കഴിയുന്നില്ലെന്ന അസന്തോഷത്തെ തുടർന്നാണ് യുഎഇ ഒപെക്-ലും ഒപെക് പ്ലസിലും നിന്ന് ഔദ്യോഗികമായി പിന്മാറിയത്. ഉൽപ്പാദന ശേഷി വർധിപ്പിക്കുന്നതിനായി വലിയ നിക്ഷേപങ്ങൾ നടത്തിയ യുഎഇ, ഹർമൂസ് കടലിടുക്ക് പൂർണമായും തുറന്ന് കപ്പൽഗതാഗതം സാധാരണ നിലയിലാകുന്ന സാഹചര്യത്തിൽ സ്വതന്ത്രമായി എണ്ണ ഉൽപ്പാദനം വൻതോതിൽ ഉയർത്താൻ സാധ്യതയുണ്ടെന്നാണ് വിലയിരുത്തൽ.
അടുത്ത മാസങ്ങളിൽ യുഎഇയുടെ ഉൽപ്പാദനം ദിനംപ്രതി 50 ലക്ഷം ബാരലിനടുത്തെത്താനിടയുണ്ടെന്ന് ഊർജ മേഖലയിലെ വിദഗ്ധർ വിലയിരുത്തുന്നു. എന്നാൽ ഹോർമുസ് കടലിടുക്കുമായി ബന്ധപ്പെട്ട ഉപരോധവും മേഖലയിലെ സംഘർഷാവസ്ഥയും ഗൾഫ് മേഖലയിലെ എണ്ണ കയറ്റുമതിയെയും കപ്പൽഗതാഗതത്തെയും ഇപ്പോഴും ബാധിച്ചുകൊണ്ടിരിക്കുകയാണ്.
യുഎഇയുടെ പിന്മാറ്റത്തെക്കുറിച്ച് ഒപെക് പ്ലസ് ഔദ്യോഗിക പ്രസ്താവനയിൽ പരാമർശിക്കാതിരുന്നത് കൂട്ടായ്മയുടെ സ്ഥിരതയും ഐക്യവും നിലനിൽക്കുന്നുവെന്ന സന്ദേശം നൽകാനുള്ള ശ്രമമായാണ് നിരീക്ഷകർ കാണുന്നത്. അതേസമയം, ഭൗമരാഷ്ട്രീയ അനിശ്ചിതത്വവും ഗതാഗത തടസങ്ങളും കാരണം പല അംഗരാജ്യങ്ങളുടെയും യഥാർത്ഥ ഉൽപ്പാദനം പുതുക്കിയ ക്വോട്ടയേക്കാൾ താഴെയാണെന്നും വിദഗ്ധർ ചൂണ്ടിക്കാട്ടുന്നു.
ആഗോള ഊർജ വിപണിയിലെ വിതരണ ആശങ്കകൾ കുറയ്ക്കാനാണ് പുതിയ ക്വോട്ട വർധന ലക്ഷ്യമിടുന്നതെങ്കിലും, മേഖലയിലെ അനിശ്ചിതാവസ്ഥ തുടരുന്നതിനാൽ വിപണി ഇപ്പോഴും ജാഗ്രതയോടെയാണ് പ്രതികരിക്കുന്നത്.
