തിരുവനന്തപുരം: നിയമസഭാ തെരഞ്ഞെടുപ്പിലെ ജനവിധിയെ ആദരവോടെ സ്വീകരിക്കുന്നുവെന്നും കേരള ജനതയുടെ വിശ്വാസം കൂടുതൽ ശക്തമായി വീണ്ടെടുക്കാൻ ഇടതുപക്ഷം തിരിച്ചുവരുമെന്നും സിപിഐ എം പൊളിറ്റ് ബ്യൂറോ അംഗം പിണറായി വിജയൻ പറഞ്ഞു.
തെരഞ്ഞെടുപ്പ് ഫലത്തിന് പിന്നാലെ പുറത്തിറക്കിയ പ്രസ്താവനയിലാണ് അദ്ദേഹം നിലപാട് വ്യക്തമാക്കിയത്.
എൽഡിഎഫിന് ലഭിച്ച ജനവിധി ഒരു അവസാനമല്ലെന്നും തുടർച്ചയായ രാഷ്ട്രീയ പ്രവർത്തനത്തിനുള്ള പുതിയ തുടക്കമാണെന്നും അദ്ദേഹം പറഞ്ഞു. ജനങ്ങളുടെ അഭിപ്രായങ്ങളും ആശങ്കകളും വിമർശനങ്ങളും ഗൗരവത്തോടെ പരിശോധിച്ച് കൂടുതൽ കരുത്തോടെ മുന്നോട്ടുപോകാൻ ഇടതുപക്ഷം പ്രതിജ്ഞാബദ്ധമാണെന്നും പിണറായി വിജയൻ വ്യക്തമാക്കി.
ജനങ്ങളുടെ വിശ്വാസം മെച്ചപ്പെട്ട നിലയിൽ വീണ്ടെടുക്കാനും കേരളത്തിന്റെ ഭാവിക്കും ജനക്ഷേമത്തിനും ജനാധിപത്യ-മതനിരപേക്ഷ മൂല്യങ്ങൾക്കുമായി പോരാട്ടം തുടരുമെന്നും അദ്ദേഹം പറഞ്ഞു. അതേസമയം തെരഞ്ഞെടുപ്പിലെ പരാജയം അപ്രതീക്ഷിതമായിരുന്നുവെന്നും അത് ഗൗരവത്തോടെ പരിശോധിക്കുമെന്നും അദ്ദേഹം സൂചിപ്പിച്ചു.
പ്രതിപക്ഷമായാലും ജനങ്ങളുടെ ജീവിതനിലവാരം ഉയർത്തുന്ന നല്ല നടപടികൾക്ക് പിന്തുണ നൽകുമെന്നും ജനവിരുദ്ധ നയങ്ങൾക്കെതിരെ ശക്തമായി നിലകൊള്ളുമെന്നും പിണറായി വിജയൻ വ്യക്തമാക്കി. സമ്പദ് വ്യവസ്ഥ, യുവജന തൊഴിലവസരങ്ങൾ, സാമൂഹ്യനീതി, പൊതുആരോഗ്യം, വിദ്യാഭ്യാസം തുടങ്ങിയ മേഖലകളിൽ എൽഡിഎഫ് മുന്നോട്ടുവെച്ച വികസന കാഴ്ചപ്പാടുകൾ ശക്തമായ പ്രതിപക്ഷ നിലപാടിലൂടെ മുന്നോട്ടുകൊണ്ടുപോകുമെന്നും അദ്ദേഹം പറഞ്ഞു.
