തിരുവനന്തപുരം: കേരളത്തിലെ അടുത്ത മുഖ്യമന്ത്രിയെ കുറിച്ചുള്ള ചർച്ചകൾ യു.ഡി.എഫിനകത്ത് കൂടുതൽ സജീവമാകുന്നതിനിടെ വിവിധ നേതാക്കൾ തുറന്ന പിന്തുണയുമായി രംഗത്തെത്തി. മുഖ്യമന്ത്രി സ്ഥാനത്തേക്കുള്ള പേരുകൾ ചർച്ചയാകുന്നതിനൊപ്പം കോൺഗ്രസിനകത്തെ ഗ്രൂപ്പ് നീക്കങ്ങളും ശക്തമായിരിക്കുകയാണ്.
പ്രതിപക്ഷ നേതാവ് വി.ഡി. സതീശന് അനുകൂലമായി ശശി തരൂർ എം.പി. രംഗത്തെത്തിയതാണ് പുതിയ രാഷ്ട്രീയ ചർച്ചകൾക്ക് വഴിവെച്ചത്. ഹൈക്കമാൻഡുമായി ബന്ധപ്പെട്ട ഗർഘയെ കണ്ട തരൂർ സംസ്ഥാനത്തെ നിലവിലെ രാഷ്ട്രീയ സാഹചര്യം വിശദീകരിച്ചുവെന്നാണ് സൂചന. പാർട്ടിക്കുള്ളിലെ വികാരങ്ങളും ജനാഭിപ്രായവും ഗർഘയെ ബോധിപ്പിച്ചുവെന്നും തരൂർ വ്യക്തമാക്കി.
ഇതിനിടെ വി.ഡി. സതീശന് പിന്തുണ പ്രഖ്യാപിച്ച് ഐ.എൻ.ടി.യു.സി നേതാവ് ആർ. ചന്ദ്രശേഖരനും രംഗത്തെത്തി. തെരഞ്ഞെടുപ്പ് വിജയത്തിൽ സതീശന്റെ നേതൃത്വത്തിന് വലിയ പങ്കുണ്ടെന്നും അദ്ദേഹത്തെ മുഖ്യമന്ത്രിയാക്കണമെന്ന് പ്രവർത്തകരിൽ ശക്തമായ ആവശ്യമുണ്ടെന്നും അദ്ദേഹം പറഞ്ഞു.
അതേസമയം, എ.ഐ.സി.സി ജനറൽ സെക്രട്ടറി കെ.സി. വേണുഗോപാലിനും ശക്തമായ പിന്തുണ ലഭിച്ചിരിക്കുകയാണ്. കെ.പി.സി.സി പ്രസിഡന്റ് സണ്ണി ജോസഫ് കെ.സി. വേണുഗോപാലിനെ പിന്തുണയ്ക്കുന്നുവെന്നാണ് റിപ്പോർട്ടുകൾ. കൂടാതെ ടി. സിദ്ധിഖ് എം.എൽ.എയും സന്ദീപ് വാര്യരും കെ.സി. വേണുഗോപാലിന് അനുകൂല നിലപാട് സ്വീകരിച്ചതായും രാഷ്ട്രീയ വൃത്തങ്ങൾ സൂചിപ്പിക്കുന്നു.
മുഖ്യമന്ത്രി തിരഞ്ഞെടുപ്പ് വൈകുന്നതിൽ യു.ഡി.എഫിലെ പ്രധാന ഘടകകക്ഷിയായ മുസ്ലിം ലീഗ് അതൃപ്തി പ്രകടിപ്പിച്ചിട്ടുണ്ട്. ഭരണ രൂപീകരണ നടപടികൾ വേഗത്തിലാക്കണമെന്നും അനാവശ്യമായ അനിശ്ചിതത്വം ഒഴിവാക്കണമെന്നും ലീഗ് നേതൃത്വം ആവശ്യപ്പെട്ടതായാണ് വിവരം.
കോൺഗ്രസ് ഹൈക്കമാൻഡിന്റെ അന്തിമ തീരുമാനം വരും ദിവസങ്ങളിൽ ഉണ്ടാകുമെന്നാണ് പ്രതീക്ഷ. അതേസമയം, മുഖ്യമന്ത്രി സ്ഥാനത്തെ ചുറ്റിപ്പറ്റിയുള്ള ചർച്ചകൾ കേരള രാഷ്ട്രീയത്തിൽ വലിയ കൗതുകമായി തുടരുകയാണ്.
