തമിഴ്നാട്ടിൽ അധികാരമേറ്റ് ദിവസങ്ങൾക്കകം തന്നെ മുഖ്യമന്ത്രി സി. ജോസഫ് വിജയ് സുപ്രധാന നയതീരുമാനവുമായി രംഗത്തെത്തി. ക്ഷേത്രങ്ങൾ, സ്കൂളുകൾ, വിദ്യാഭ്യാസ സ്ഥാപനങ്ങൾ, ബസ് സ്റ്റാൻഡുകൾ എന്നിവയിൽ നിന്ന് 500 മീറ്റർ പരിധിക്കുള്ളിൽ പ്രവർത്തിക്കുന്ന 717 ടാസ്മാക് മദ്യവിൽപ്പനശാലകൾ അടച്ചുപൂട്ടാൻ അദ്ദേഹം ഉത്തരവിട്ടു. നടനും രാഷ്ട്രീയനേതാവുമായ വിജയ് നയിച്ച തമിഴക വെട്രി കഴകം(ടിവികെ) സമീപകാല നിയമസഭാ തെരഞ്ഞെടുപ്പിൽ വൻവിജയം നേടി ദശാബ്ദങ്ങളായുള്ള ദ്രാവിഡ പാർട്ടികളുടെ ആധിപത്യത്തിന് വിരാമമിട്ടതിന് പിന്നാലെയാണ് നടപടി.
സംസ്ഥാന സർക്കാർ പുറത്തുവിട്ട കണക്കുകൾ പ്രകാരം അടച്ചുപൂട്ടാൻ നിർദേശിച്ചിരിക്കുന്ന കടകളിൽ 276 എണ്ണം ക്ഷേത്രങ്ങൾക്കും മറ്റ് ആരാധനാലയങ്ങൾക്കും സമീപത്തും, 186 എണ്ണം വിദ്യാഭ്യാസ സ്ഥാപനങ്ങൾക്കു സമീപത്തും, 255 എണ്ണം ബസ് സ്റ്റാൻഡുകൾക്കു സമീപത്തുമാണ് പ്രവർത്തിക്കുന്നത്. സംസ്ഥാനത്തെ എല്ലാ ടാസ്മാക് ഔട്ട്ലെറ്റുകളുടെയും സർവേ പൂർത്തിയാക്കിയ ശേഷം രണ്ടാഴ്ചയ്ക്കകം നടപടി നടപ്പാക്കാൻ അധികൃതർക്ക് നിർദേശം നൽകിയിട്ടുണ്ട്.
മദ്യനിയന്ത്രണവുമായി ബന്ധപ്പെട്ട് തെരഞ്ഞെടുപ്പ് പ്രചാരണത്തിനിടെ ടിവികെ നൽകിയ പ്രധാന വാഗ്ദാനങ്ങളിലൊന്നാണ് ഈ നടപടി വഴി നടപ്പാക്കപ്പെടുന്നതെന്നാണ് വിലയിരുത്തൽ. മുൻ സർക്കാരുകൾ മദ്യവിൽപ്പന വ്യാപിപ്പിച്ചുവെന്ന് ആരോപിച്ച വിജയ്, “മയക്കുമരുന്ന് രഹിത തമിഴ്നാട്” സൃഷ്ടിക്കുമെന്നും മദ്യവുമായി ബന്ധപ്പെട്ട സാമൂഹിക പ്രശ്നങ്ങൾ കുറയ്ക്കാൻ ശക്തമായ നടപടികൾ സ്വീകരിക്കുമെന്നും പ്രചാരണ വേളയിൽ പ്രഖ്യാപിച്ചിരുന്നു.
തമിഴ്നാട്ടിൽ മദ്യനിരോധനത്തിനും മദ്യനിയന്ത്രണത്തിനും ദീർഘകാല രാഷ്ട്രീയ പശ്ചാത്തലമുണ്ട്. മുൻ മുഖ്യമന്ത്രിമാരായ ജെ. ജയലളിതയുടെയും എടപ്പാടി കെ. പഴനിസ്വാമിയുടെയും നേതൃത്വത്തിലുള്ള സർക്കാരുകൾ ഘട്ടംഘട്ടമായി ടാസ്മാക് കടകൾ അടച്ചുപൂട്ടുന്ന നടപടികൾ മുമ്പ് സ്വീകരിച്ചിരുന്നു.
അതേസമയം, തമിഴ്നാട് സർക്കാരിന്റെ പ്രധാന വരുമാന സ്രോതസ്സുകളിലൊന്നാണ് ടാസ്മാക് എന്നതിനാൽ പുതിയ തീരുമാനം സാമ്പത്തിക-രാഷ്ട്രീയ തലങ്ങളിൽ വ്യാപക ചർച്ചകൾക്ക് വഴിവെക്കുമെന്നാണ് വിലയിരുത്തൽ.
