ന്യൂഡൽഹി: കംബോഡിയ സന്ദർശിക്കുന്ന ഇന്ത്യൻ യാത്രക്കാർക്ക് ഇനി യു.പി.ഐ ആപ്പുകൾ ഉപയോഗിച്ച് തത്സമയ ക്യൂആർ പേയ്മെന്റുകൾ നടത്താൻ സൗകര്യം ലഭിച്ചു. ഇന്ത്യയുടെ ഡിജിറ്റൽ പേയ്മെന്റ് സംവിധാനത്തെ അന്താരാഷ്ട്ര തലത്തിലേക്ക് വ്യാപിപ്പിക്കുന്നതിന്റെ ഭാഗമായി, നാഷണൽ പേയ്മെന്റ്സ് കോർപ്പറേഷൻ ഓഫ് ഇന്ത്യയുടെ അന്താരാഷ്ട്ര വിഭാഗമായ എൻപിസിഐ ഇന്റർനാഷണൽ കംബോഡിയയിലെ പ്രമുഖ ബാങ്കായ അക്ലെഡ ബാങ്കുമായി സഹകരിച്ചാണ് പുതിയ സേവനം നടപ്പിലാക്കിയത്.
പുതിയ സംവിധാനത്തിലൂടെ കംബോഡിയയിലെ പ്രാദേശിക കെ.എച്ച്.ക്യു.ആർ നെറ്റ്വർക്കുമായി യു.പി.ഐ ബന്ധിപ്പിച്ചിരിക്കുകയാണ്. ഇതോടെ ഇന്ത്യൻ വിനോദസഞ്ചാരികൾക്കും ബിസിനസ് യാത്രക്കാർക്കും രാജ്യത്തുടനീളമുള്ള 45 ലക്ഷത്തിലധികം വ്യാപാര സ്ഥാപനങ്ങളിൽ ക്യൂആർ കോഡ് സ്കാൻ ചെയ്ത് എളുപ്പത്തിൽ പണമടയ്ക്കാൻ സാധിക്കും. വിനോദസഞ്ചാര കേന്ദ്രങ്ങൾ, റെസ്റ്റോറന്റുകൾ, ഹോട്ടലുകൾ, റീട്ടെയിൽ കടകൾ തുടങ്ങി വ്യാപകമായ വ്യാപാര ശൃംഖലയാണ് ഇതിന്റെ പരിധിയിൽ വരുന്നത്.
ഇന്ത്യ-കംബോഡിയ ഡിജിറ്റൽ പേയ്മെന്റ് സഹകരണത്തിന്റെ ആദ്യഘട്ടമായാണ് ഈ സൗകര്യം അവതരിപ്പിച്ചിരിക്കുന്നത്. അടുത്ത ഘട്ടത്തിൽ കംബോഡിയൻ സന്ദർശകർക്കും അവരുടെ പ്രാദേശിക മൊബൈൽ പേയ്മെന്റ് ആപ്പുകൾ ഉപയോഗിച്ച് ഇന്ത്യയിലെ യു.പി.ഐ വ്യാപാര സ്ഥാപനങ്ങളിൽ നേരിട്ട് പണമടയ്ക്കാനുള്ള സൗകര്യം ഒരുക്കും.
അതിർത്തികൾക്കപ്പുറം ഡിജിറ്റൽ ഇടപാടുകൾ കൂടുതൽ എളുപ്പമാക്കുകയും, വിനോദസഞ്ചാരത്തിനും വ്യാപാരത്തിനും പുതിയ സാധ്യതകൾ തുറക്കുകയും ചെയ്യുന്ന സുപ്രധാന ചുവടുവയ്പ്പായാണ് ഈ പദ്ധതിയെ വിലയിരുത്തുന്നത്.
