കോഴിക്കോട്: ജോലിസംബന്ധമായ ആവശ്യങ്ങൾക്കായി രാജസ്ഥാനിലേക്ക് യാത്ര ചെയ്യുന്നതിനിടെ ട്രെയിനിൽ നിന്ന് വീണ് ഗുരുതരമായി പരിക്കേറ്റ കോഴിക്കോട് കൊയിലാണ്ടി പുളിയഞ്ചേരി മുണ്ടാടികുനി സ്വദേശി ലിനീഷ് (44) ചികിത്സയിലിരിക്കെ മരിച്ചു.
അപകടത്തെ തുടർന്ന് ലിനീഷിനെ ഉടൻ തന്നെ രാജസ്ഥാനിലെ ജോധ്പൂരിലുള്ള എം.ഡി.എം ആശുപത്രിയിൽ പ്രവേശിപ്പിച്ചെങ്കിലും ചികിത്സ ഫലിക്കാതെ മരണത്തിന് കീഴടങ്ങുകയായിരുന്നു. അപകടം എങ്ങനെ സംഭവിച്ചുവെന്നതിൽ കൂടുതൽ വിവരങ്ങൾ ലഭ്യമായിട്ടില്ല.
മികച്ച പരിസ്ഥിതി പ്രവർത്തകനും സാമൂഹിക പ്രവർത്തനങ്ങളിൽ സജീവ സാന്നിധ്യവുമായിരുന്ന ലിനീഷിന്റെ അകാല വിയോഗം പുളിയഞ്ചേരി പ്രദേശത്തിന് വലിയ നഷ്ടമായതായി നാട്ടുകാർ അനുശോചിച്ചു. പ്രകൃതി സംരക്ഷണ പ്രവർത്തനങ്ങളിലും പൊതുപ്രവർത്തനങ്ങളിലും അദ്ദേഹം നൽകിയ സംഭാവനകൾ പ്രദേശവാസികൾ അനുസ്മരിച്ചു.
ലിനീഷിന്റെ നിര്യാണത്തിൽ വിവിധ സാമൂഹിക, സാംസ്കാരിക സംഘടനകളും പ്രദേശവാസികളും അനുശോചനം രേഖപ്പെടുത്തി. മൃതദേഹം നടപടിക്രമങ്ങൾ പൂർത്തിയാക്കിയ ശേഷം നാട്ടിലെത്തിക്കുമെന്ന് ബന്ധപ്പെട്ടവർ അറിയിച്ചു.
