ആന്ധ്രാപ്രദേശിലെ ജൊന്നഗിരി സ്വർണഖനിയിൽ നിന്ന് ഉൽപ്പാദിപ്പിച്ച ആദ്യ സ്വർണബിസ്കറ്റ് വിപണിയിലെത്തി. 300 ഗ്രാം ഭാരവും 999 ശുദ്ധതയുമുള്ള ഈ പ്രത്യേക സ്വർണബാർ ആന്ധ്രാപ്രദേശിലെ കർണൂൽ നഗരത്തിലെ വെങ്കടാചലപതി സറാഫ് ബസാർ ആഭരണശാലയിലാണ് പൊതുജനങ്ങൾക്ക് വിൽപ്പനയ്ക്ക് ലഭ്യമാക്കിയിരിക്കുന്നത്. ബാറിൽ ആന്ധ്രാപ്രദേശിന്റെ ഭൂപടം പതിപ്പിച്ചിട്ടുള്ളതാണ് പ്രധാന പ്രത്യേകത.
ജൊന്നഗിരി സ്വർണഖനി സ്വാതന്ത്ര്യാനന്തര ഇന്ത്യയിലെ ആദ്യത്തെ വലിയ സ്വകാര്യ മേഖലയിലെ സ്വർണഖനിയെന്ന നിലയിൽ ശ്രദ്ധേയമാണ്. 2026 ജൂണിൽ ജിയോമൈസോർ സർവീസസ് ഖനി പ്രവർത്തനമാരംഭിച്ചതോടെ പ്രതിവർഷം ഏകദേശം 400 കിലോഗ്രാം സ്വർണം ഉൽപ്പാദിപ്പിക്കുകയാണ് ലക്ഷ്യമിടുന്നത്. ഈ പദ്ധതിയിലൂടെ പ്രാദേശിക തൊഴിലവസരങ്ങൾ വർധിപ്പിക്കാനും ഇന്ത്യയുടെ ആഭ്യന്തര സ്വർണ ഉൽപ്പാദനം ശക്തിപ്പെടുത്താനും സംസ്ഥാനത്തിന്റെ സ്വർണവിപണിയിലെ സാന്നിധ്യം ഉയർത്താനും കഴിയുമെന്നാണ് പ്രതീക്ഷ.
