തിരുവനന്തപുരം: സപ്ലൈകോയുടെ ഓണം വിപണിയിൽ സർവകാല റെക്കോഡ് വിറ്റുവരവ്. ജൂലൈ 22 മുതൽ ഓഗസ്റ്റ് 25 വരെ 35 ദിവസത്തിനിടെ 422.17 കോടി രൂപയുടെ വിറ്റുവരവാണ് സപ്ലൈകോ നേടിയത്.

ഇതിൽ 153.49 കോടി രൂപ സബ്സിഡി സാധനങ്ങളുടെ വിൽപ്പനയിലൂടെയും 268.89 കോടി രൂപ നോൺ-സബ്സിഡി സാധനങ്ങളുടെ വിൽപ്പനയിലൂടെയുമാണ് ലഭിച്ചത്. 2025ലെ ഓണക്കാലത്തെ 35 ദിവസത്തെ ആകെ വിറ്റുവരവ് 385.42 കോടി രൂപയായിരുന്നു. കഴിഞ്ഞ വർഷം സബ്സിഡി സാധനങ്ങളിൽ നിന്ന് 180.03 കോടിയും നോൺ-സബ്സിഡി സാധനങ്ങളിൽ നിന്ന് 205.11 കോടിയുമാണ് ലഭിച്ചത്.

മിക്ക സബ്സിഡി സാധനങ്ങൾക്കും വില വർധിപ്പിക്കാതെയും ചില ഉൽപ്പന്നങ്ങൾക്ക് വില കുറച്ചും നടത്തിയ വിൽപ്പനയാണ് ഇത്തവണത്തെ റെക്കോഡ് നേട്ടത്തിന് പ്രധാന കാരണമെന്ന് അധികൃതർ വ്യക്തമാക്കി. 13 അവശ്യ സബ്സിഡി സാധനങ്ങളുടെ വില വർധിപ്പിച്ചില്ല. ചെറുപയർ, ഉഴുന്ന്, കടല, വൻപയർ, തുവരപ്പരിപ്പ് തുടങ്ങിയവ സബ്സിഡി നിരക്കിൽ ലഭ്യമാക്കി. ശബരി സബ്സിഡി വെളിച്ചെണ്ണയ്ക്കും 20 രൂപയുടെ വിലക്കുറവ് അനുവദിച്ചിരുന്നു. കഴിഞ്ഞ വർഷം വെളിച്ചെണ്ണ വിൽപ്പനയിൽ നിന്ന് മാത്രം 100 കോടി രൂപയുടെ വിറ്റുവരവ് നേടിയിരുന്നു.

സംസ്ഥാനത്തുടനീളം സംഘടിപ്പിച്ച മൂന്ന് മെഗാ ട്രേഡ് ഫെയറുകൾ, 11 ജില്ലാ ഫെയറുകൾ, 126 അസംബ്ലി ഫെയറുകൾ എന്നിവയിലായി 40 ലക്ഷത്തിലധികം പേരാണ് ഇത്തവണ എത്തിയത്. ജനങ്ങൾ സപ്ലൈകോ വിപണിയെ കൂടുതൽ ആശ്രയിച്ചതാണ് റെക്കോഡ് വിറ്റുവരവിന് വഴിയൊരുക്കിയതെന്നാണ് വിലയിരുത്തൽ.

കഴിഞ്ഞ വർഷത്തെ അപേക്ഷിച്ച് സപ്ലൈകോയുടെ ഓണം വിപണി വിറ്റുവരവിൽ ഇത്തവണ ഗണ്യമായ വർധനവാണ് രേഖപ്പെടുത്തിയിരിക്കുന്നത്.

തളിപ്പറമ്പ് എംഎൽഎ ടികെ ഗോവിന്ദൻ മാസ്റ്ററുടെ പോസ്റ്റ്,മണ്ഡലത്തിൽ കെഎസ്ആർടിസി (പ്രിയദർശിനി )ശ്രീകണ്ഠപുരം അഡൂർ മലപ്പട്ടം കണ്ണൂർ സർവീസ് ഇന്ന് മലപ്പട്ടത്ത് വെച്ച് ഫ്ലാഗ് ഓഫ് ചെയ്തു
സാധാരണ ജനങ്ങൾക്ക് ഉപകാരപ്രദമാകുന്ന തരത്തിൽ മണ്ഡലത്തിന്റെ ഉൾ ഭാഗങ്ങളിലൂടെയാണ് ബസ് സർവീസ് കടന്നുപോകുന്നത്…