തഞ്ചാവൂർ: നടി തൃഷയെക്കുറിച്ച് സ്ത്രീവിരുദ്ധമായ ഇരട്ട അർത്ഥ പരാമർശം നടത്തിയെന്ന പരാതിയിൽ കസ്റ്റഡിയിലെടുത്ത ഡിഎംകെ നേതാവ് ഉദയനിധി സ്റ്റാലിനെ ചോദ്യം ചെയ്യലിന് ശേഷം ജാമ്യത്തിൽ വിട്ടയച്ചു. തഞ്ചാവൂരിലെ സെങ്കിപ്പട്ടി പൊലീസ് സ്റ്റേഷനിൽ നടന്ന ചോദ്യം ചെയ്യലിന് ശേഷമാണ് രാത്രി അദ്ദേഹം പുറത്തിറങ്ങിയത്.
സ്റ്റാലിൻ പൊലീസ് സ്റ്റേഷനിൽ നിന്ന് പുറത്തേക്ക് എത്തിയപ്പോൾ ഡിഎംകെ പ്രവർത്തകർ ആവേശത്തോടെ സ്വീകരിച്ചു. പ്രവർത്തകർ കൈകൾ ഉയർത്തിയും പൂക്കൾ വിതറിയും മുദ്രാവാക്യം വിളിച്ചുമാണ് അദ്ദേഹത്തെ വരവേറ്റത്. ഇതിന്റെ ദൃശ്യങ്ങൾ സമൂഹമാധ്യമങ്ങളിലും വ്യാപകമായി പ്രചരിച്ചു.
കാവേരി ജലപ്രശ്നവുമായി ബന്ധപ്പെട്ട് നടത്തിയ പൊതുയോഗത്തിനിടെയാണ് തൃഷയെ അപകീർത്തിപ്പെടുത്തുന്നതും സ്ത്രീവിരുദ്ധവുമായ പരാമർശം നടത്തിയെന്ന പരാതി ഉയർന്നത്. തമിഴ്നാട് മുഖ്യമന്ത്രി ജോസഫ് വിജയിനെ വിമർശിച്ചുകൊണ്ടുള്ള രാഷ്ട്രീയ പ്രതിഷേധ പരിപാടിയിലായിരുന്നു പരാമർശമെന്നാണ് റിപ്പോർട്ട്.
പരാതിയുടെ അടിസ്ഥാനത്തിൽ പൊലീസ് ഉദയനിധിയെ കസ്റ്റഡിയിലെടുത്ത് സെങ്കിപ്പട്ടി സ്റ്റേഷനിലെത്തിച്ച് ചോദ്യം ചെയ്യുകയായിരുന്നു. അതേസമയം, അദ്ദേഹത്തെ കസ്റ്റഡിയിലെടുത്ത നടപടിയിൽ പ്രതിഷേധിച്ച് ഡിഎംകെ പ്രവർത്തകർ സ്ഥലത്ത് പ്രതിഷേധവുമായി എത്തിയിരുന്നു.
തുടർന്ന് മദ്രാസ് ഹൈക്കോടതി ഇടപെട്ട് ഉദയനിധിയെ അതേദിവസം തന്നെ സ്റ്റേഷൻ ജാമ്യത്തിൽ വിട്ടയക്കാൻ നിർദേശിച്ചു. ഹ്രസ്വമായ പൊലീസ് ചോദ്യം ചെയ്യലിന് ശേഷമാണ് നടപടി പൂർത്തിയാക്കി അദ്ദേഹത്തെ വിട്ടയച്ചത്.
ഉദയനിധിയുടെ കസ്റ്റഡിയും തുടർന്നുണ്ടായ പ്രതിഷേധങ്ങളും തമിഴ്നാട്ടിലെ ഭരണകക്ഷിയായ ടിവികെയും ഡിഎംകെയും തമ്മിലുള്ള രാഷ്ട്രീയ സംഘർഷം കൂടുതൽ ശക്തമാക്കുന്ന സാഹചര്യത്തിലാണ് പുതിയ സംഭവവികാസങ്ങൾ.
