തിരുവനന്തപുരം: ഓണം ഉത്സവത്തോടനുബന്ധിച്ചുള്ള യാത്രക്കാരുടെ അധിക തിരക്ക് പരിഗണിച്ച് സംബൽപുർ–എറണാകുളം ജംഗ്ഷൻ റൂട്ടിൽ പ്രത്യേക ട്രെയിനുകൾ സർവീസ് നടത്തുമെന്ന് ദക്ഷിണ റെയിൽവേ അറിയിച്ചു. തിരുവനന്തപുരം ഡിവിഷന്റെ നേതൃത്വത്തിലാണ് ഓണം ഫെസ്റ്റിവൽ സ്പെഷ്യൽ ട്രെയിൻ സർവീസുകൾ ക്രമീകരിച്ചിരിക്കുന്നത്.

ട്രെയിൻ നമ്പർ 08311 സംബൽപുർ–എറണാകുളം ജംഗ്ഷൻ എക്സ്പ്രസ് സ്പെഷ്യൽ ഓഗസ്റ്റ് 19, ഓഗസ്റ്റ് 26, സെപ്റ്റംബർ 2 തീയതികളിൽ സർവീസ് നടത്തും. ബുധനാഴ്ചകളിൽ സംബൽപൂരിൽ നിന്ന് രാത്രി 11.35ന് പുറപ്പെടുന്ന ട്രെയിൻ മൂന്നാം ദിവസം പുലർച്ചെ 5.40ന് എറണാകുളം ജംഗ്ഷനിലെത്തും.

തിരിച്ചുള്ള ട്രെയിൻ നമ്പർ 08312 എറണാകുളം ജംഗ്ഷൻ–സംബൽപുർ എക്സ്പ്രസ് സ്പെഷ്യൽ ഓഗസ്റ്റ് 21, ഓഗസ്റ്റ് 28, സെപ്റ്റംബർ 4 തീയതികളിലാണ് സർവീസ്. വെള്ളിയാഴ്ച രാവിലെ 8.40ന് എറണാകുളം ജംഗ്ഷനിൽ നിന്ന് പുറപ്പെടുന്ന ട്രെയിൻ അടുത്ത ദിവസം രാത്രി 11.15ന് സംബൽപൂരിലെത്തും.

ബർഗഢ് റോഡ്, ബാലാംഗിർ, ടിറ്റ്ലാഗഢ്, കേസിംഗ, മുനിഗുഡ, റായഗഡ, പർവതിപുരം, ബോബ്ബിലി, വിജയനഗരം, അനകാപ്പള്ളി, സമൽകോട്ട്, രാജമുണ്ട്രി, വിജയവാഡ, നെല്ലൂർ, ഗുഡൂർ, പെരമ്പൂർ, കാട്പാടി, ജോലാർപേട്ട, സേലം, ഈറോഡ്, തിരുപ്പൂർ, പോഡനൂർ, പാലക്കാട്, തൃശൂർ, ആലുവ തുടങ്ങിയ പ്രധാന സ്റ്റേഷനുകളിൽ ട്രെയിനുകൾക്ക് സ്റ്റോപ്പുണ്ടാകും.

അഡ്വാൻസ് റിസർവേഷൻ ഓഗസ്റ്റ് 9 ഞായറാഴ്ച രാവിലെ 8 മണി മുതൽ ആരംഭിക്കും. ഓണം കാലത്തെ അധിക യാത്രാ തിരക്ക് കുറയ്ക്കുന്നതിനും യാത്രക്കാർക്ക് കൂടുതൽ സൗകര്യം ഒരുക്കുന്നതിനുമാണ് പ്രത്യേക സർവീസുകൾ ഏർപ്പെടുത്തിയിരിക്കുന്നത്.