തിരുവനന്തപുരം: സി.എം.ആർ.എൽ–എക്സാലോജിക് മാസപ്പടി വിവാദത്തിൽ മുൻ മുഖ്യമന്ത്രി പിണറായി വിജയൻ, മകൾ ടി. വീണ, മുൻ മന്ത്രി പി.എ. മുഹമ്മദ് റിയാസ് എന്നിവർക്കെതിരെ അഴിമതി നിരോധന നിയമപ്രകാരം കേസെടുക്കണമെന്ന് ആവശ്യപ്പെട്ട് എൻഫോഴ്സ്മെന്റ് ഡയറക്ടറേറ്റ് (ഇ.ഡി) സംസ്ഥാന പോലീസ് മേധാവിക്ക് റിപ്പോർട്ട് നൽകിയ സംഭവത്തിൽ പ്രതികരണവുമായി സി.പി.ഐ.എം സംസ്ഥാന സെക്രട്ടറി എം.വി. ഗോവിന്ദൻ. ഇ.ഡിയുടെ നടപടി പിണറായി വിജയനെ ലക്ഷ്യമിട്ടുള്ള ബോധപൂർവമായ രാഷ്ട്രീയ നീക്കമാണെന്ന് അദ്ദേഹം ആരോപിച്ചു.

കേന്ദ്ര അന്വേഷണ ഏജൻസികളെ ഉപയോഗിച്ച് മാധ്യമങ്ങളിലൂടെ വാർത്തകൾ സൃഷ്ടിക്കുകയും അന്വേഷണം പിണറായി വിജയനിലേക്ക് എത്തിക്കുകയുമാണ് ഇ.ഡി ലക്ഷ്യമിടുന്നതെന്നാണ് എം.വി. ഗോവിന്ദന്റെ ആരോപണം. ഇ.ഡിയുടെ നീക്കത്തെ പാർട്ടിയും മുന്നണിയും രാഷ്ട്രീയമായും നിയമപരമായും ശക്തമായി നേരിടുമെന്നും അദ്ദേഹം വ്യക്തമാക്കി.

മാസപ്പടി വിഷയത്തിൽ നേരത്തെ ഉയർന്ന ആരോപണങ്ങൾ ചൂണ്ടിക്കാട്ടി കോൺഗ്രസ് നേതാവ് മാത്യു കുഴൽനാടനും ബി.ജെ.പി നേതാവ് ഷോൺ ജോർജും കോടതിയെ സമീപിച്ചിരുന്നുവെന്നും എന്നാൽ ആരോപണങ്ങളിൽ കഴമ്പില്ലെന്ന് കണ്ടെത്തി കോടതികൾ അവ തള്ളിയതാണെന്നും എം.വി. ഗോവിന്ദൻ പറഞ്ഞു.
കേന്ദ്രത്തിലെ ബി.ജെ.പിയും കേരളത്തിലെ യു.ഡി.എഫ് സർക്കാരും തമ്മിലുള്ള രാഷ്ട്രീയ ഒത്തുകളിയുടെ ഭാഗമാണ് ഇപ്പോഴത്തെ നടപടിയെന്നും സി.പി.ഐ.എം സംസ്ഥാന സെക്രട്ടറി ആരോപിച്ചു. ഡയറിയിൽ പേരുള്ള കോൺഗ്രസ് ആഭ്യന്തര മന്ത്രിയുടെ കീഴിലുള്ള പോലീസിനോടാണ് ഇ.ഡി അന്വേഷണം ആവശ്യപ്പെട്ടിരിക്കുന്നതെന്നും അദ്ദേഹം ചൂണ്ടിക്കാട്ടി. വിഷയത്തിൽ കോൺഗ്രസ് സ്വീകരിക്കുന്ന നിലപാട് കേരളം ഉറ്റുനോക്കുകയാണെന്നും എം.വി. ഗോവിന്ദൻ പറഞ്ഞു.

അതേസമയം, വീണ വിജയന്റെ ഉടമസ്ഥതയിലുള്ള എക്സാലോജിക് കമ്പനിക്ക് ലഭിച്ച പണം കൃത്യമായി നികുതി അടച്ചതാണെന്നും ഇടപാടിൽ യാതൊരു അഴിമതിയും നടന്നിട്ടില്ലെന്നും അദ്ദേഹം അവകാശപ്പെട്ടു.

പി.എം.എൽ.എ നിയമത്തിലെ സെക്ഷൻ 66(2) പ്രകാരം ലഭിച്ച തെളിവുകളുടെ അടിസ്ഥാനത്തിലാണ് സംസ്ഥാന പോലീസ് മേധാവിക്ക് 25 പേജുള്ള റിപ്പോർട്ട് നൽകിയതെന്നാണ് ഇ.ഡിയുടെ നിലപാട്. മാസപ്പടി ഇടപാടുമായി ബന്ധപ്പെട്ട് കള്ളപ്പണം വെളുപ്പിക്കൽ ഉൾപ്പെടെയുള്ള ആരോപണങ്ങളിൽ ലഭിച്ച വിവരങ്ങളുടെ അടിസ്ഥാനത്തിലാണ് റിപ്പോർട്ട് തയ്യാറാക്കിയതെന്നും ഇ.ഡി വ്യക്തമാക്കിയിട്ടുണ്ട്.
ഇ.ഡിയുടെ കത്ത് ലഭിച്ചതായി സംസ്ഥാന സർക്കാർ സ്ഥിരീകരിച്ചിട്ടുണ്ട്. റിപ്പോർട്ടിന്റെ അടിസ്ഥാനത്തിൽ തുടർ നിയമനടപടികൾ സ്വീകരിക്കണമോയെന്ന കാര്യത്തിൽ സർക്കാർ ആലോചിച്ചുവരികയാണ്.

ഇ.ഡിയുടെ നീക്കത്തോടെ മാസപ്പടി വിവാദം വീണ്ടും സംസ്ഥാന രാഷ്ട്രീയത്തിലെ പ്രധാന ചർച്ചാവിഷയമായി മാറിയിരിക്കുകയാണ്. സി.പി.ഐ.എം ഇതിനെ രാഷ്ട്രീയ പകപോക്കലായി വിശേഷിപ്പിക്കുമ്പോൾ, അന്വേഷണത്തിലൂടെ ആരോപണങ്ങളുടെ യാഥാർഥ്യം പുറത്തുവരണമെന്നാണ് പ്രതിപക്ഷത്തിന്റെ നിലപാട്.