എറണാകുളം എടയാറിൽ നടൻ നിവിൻ പോളി കേന്ദ്രകഥാപാത്രമായെത്തുന്ന ചിത്രത്തിന്റെ ഷൂട്ടിങ് ലൊക്കേഷനിൽ അപകടം. തൃശൂർ സ്വദേശിയായ ടെക്നീഷ്യൻ വിഷ്ണു (32) വൈദ്യുതാഘാതമേറ്റ് മരിച്ചു.

എടയാറിലെ ഒരു ഗോഡൗണിൽ സെറ്റിട്ടായിരുന്നു ചിത്രീകരണം നടന്നിരുന്നത്. ഇന്ന് (സെപ്റ്റംബർ 9) ഉച്ചഭക്ഷണത്തിന് ശേഷമുള്ള ഇടവേളയിലാണ് ദാരുണമായ അപകടം സംഭവിച്ചത്. ചിത്രീകരണത്തിനായി ഉയരത്തിൽ ലൈറ്റുകളും വൈദ്യുതി ക്രമീകരണങ്ങളും നടത്തുന്നതിനിടെ വിഷ്ണുവിന് ശക്തമായ വൈദ്യുതാഘാതം ഏൽക്കുകയായിരുന്നു.

നാഷിദ് ഫാമി സംവിധാനം ചെയ്യുന്ന പേരിടാത്ത ഈ ചിത്രത്തിന്റെ ഷൂട്ടിങ്ങിന്റെ ആദ്യ ദിവസമായിരുന്നു ഇന്ന് എന്നത് സംഭവത്തിന്റെ ദുരന്തസ്വഭാവം വർധിപ്പിക്കുന്നു. മാർട്ടിൻ പ്രക്കാട്ട് ഫിലിംസ്, പോളി ജൂനിയർ പിക്ചേഴ്സ്, ഗ്രീൻ റൂം പ്രൊഡക്ഷൻസ് എന്നിവർ ചേർന്നാണ് ചിത്രം നിർമിക്കുന്നത്.

സംഭവമറിഞ്ഞ് നടൻ നിവിൻ പോളി ഉൾപ്പെടെയുള്ളവർ ആശുപത്രിയിൽ എത്തി. ബിനാനിപുരം പോലീസ് സ്ഥലത്തെത്തി തുടർനടപടികൾ സ്വീകരിച്ചുവരികയാണ്.