അടിയന്തരാവസ്ഥക്കാലത്തെ തന്റെ ജയിൽവാസവുമായി ബന്ധപ്പെട്ട വിവാദത്തിൽ വ്യക്തത വരുത്തി തമിഴ്നാട് മുൻ മുഖ്യമന്ത്രിയും ഡി.എം.കെ അധ്യക്ഷനുമായ എം.കെ. സ്റ്റാലിൻ. നിയമസഭയിൽ മുഖ്യമന്ത്രി വിജയ് നടത്തിയ പരാമർശവും താടിയെല്ലിനെ സൂചിപ്പിച്ചുള്ള ആംഗ്യവും വസ്തുതാപരമാണെന്നും അതിൽ യാതൊരു അസത്യവുമില്ലെന്നും സ്റ്റാലിൻ വ്യക്തമാക്കി.

അടുത്തിടെ നിയമസഭാ സമ്മേളനത്തിനിടെ ഉണ്ടായ ചില സംഭവങ്ങൾ ജനങ്ങളിലും ഡി.എം.കെ പ്രവർത്തകരിലും പ്രതിഷേധത്തിനും അസ്വസ്ഥതയ്ക്കും കാരണമായതായി ചൂണ്ടിക്കാട്ടിയാണ് സ്റ്റാലിൻ വീഡിയോ സന്ദേശത്തിൽ പ്രതികരിച്ചത്. ‘സഹോദരൻ വിജയ്’ എന്ന് അഭിസംബോധന ചെയ്ത അദ്ദേഹം, വിജയ് പറഞ്ഞ കാര്യങ്ങൾ സത്യമായിരുന്നുവെന്ന് തുറന്നുപറഞ്ഞു.

അടിയന്തരാവസ്ഥയ്ക്കും മിസ (മെയിന്റനൻസ് ഓഫ് ഇന്റേണൽ സെക്യൂരിറ്റി ആക്ട്) നിയമത്തിനുമെതിരെ ഡി.എം.കെ മറീന ബീച്ചിൽ വൻ പ്രതിഷേധം സംഘടിപ്പിച്ചതിന് പിന്നാലെയാണ് കേന്ദ്രസർക്കാർ കരുണാനിധിയുടെ നേതൃത്വത്തിലുള്ള ഡി.എം.കെ മന്ത്രിസഭ പിരിച്ചുവിട്ടതെന്ന് സ്റ്റാലിൻ വിശദീകരിച്ചു. 1976 ജനുവരി 30–31ഓടെയായിരുന്നു നടപടി.

തുടർന്ന് മിസ നിയമപ്രകാരം തന്നെ അറസ്റ്റ് ചെയ്യാൻ പൊലീസ് ഗോപാലപുരത്തെ വീട്ടിലെത്തിയെങ്കിലും അന്ന് താൻ അവിടെയുണ്ടായിരുന്നില്ലെന്ന് സ്റ്റാലിൻ പറഞ്ഞു. പ്രചാരണത്തിനായി പുറത്തുപോയിരിക്കുകയായിരുന്നു. പിതാവ് എം. കരുണാനിധി പൊലീസിനോട് ഇക്കാര്യം അറിയിക്കുകയും സ്റ്റാലിൻ തിരിച്ചെത്തിയശേഷം അറസ്റ്റ് ചെയ്യുന്നതിനുള്ള സാഹചര്യം ഒരുക്കുകയും ചെയ്തുവെന്നും അദ്ദേഹം വ്യക്തമാക്കി.

ജയിൽവാസത്തിനിടെ താനും മറ്റ് തടവുകാരും കടുത്ത സാഹചര്യങ്ങളും മർദനവും നേരിട്ടതായി സ്റ്റാലിൻ ആരോപിച്ചു. മോശം സാഹചര്യങ്ങളിലുള്ള തടങ്കലിനൊപ്പം ക്രൂരമായ മർദനത്തിനും ഇരയായതായി അദ്ദേഹം പറഞ്ഞു.

മർദനത്തിനിടെ തന്റെ താടിയെല്ല് തകർന്നുവെന്നും അതിന്റെ പാടുകൾ ഇപ്പോഴും ശരീരത്തിൽ അവശേഷിക്കുന്നുണ്ടെന്നും സ്റ്റാലിൻ വ്യക്തമാക്കി. അന്നത്തെ സംഭവങ്ങളിൽ ഡി.എം.കെ എം.പി ചിറ്റിബാബു കൊല്ലപ്പെട്ടതും അദ്ദേഹം പരാമർശിച്ചു.

ഈ സംഭവങ്ങൾ ഡി.എം.കെയുടെ ചരിത്രത്തിലെ പോരാട്ടങ്ങളുടെ അവിഭാജ്യ ഭാഗമാണെന്നും സ്റ്റാലിൻ പറഞ്ഞു. അണ്ണാദുരൈ മുതൽ തുടരുന്ന പാർട്ടിയുടെ പോരാട്ടചരിത്രത്തിൽ താൻ അഭിമാനം കൊള്ളുന്നതായും അത് ആർക്കും മാറ്റാനോ ഇല്ലാതാക്കാനോ കഴിയില്ലെന്നും അദ്ദേഹം വ്യക്തമാക്കി.

തന്റെ ജയിൽവാസവും അതുമായി ബന്ധപ്പെട്ട സംഭവങ്ങളും സംബന്ധിച്ച് സംശയമുള്ളവർ നിയമസഭാ ലൈബ്രറിയിലെ രേഖകൾ പരിശോധിക്കണമെന്നും സ്റ്റാലിൻ ആവശ്യപ്പെട്ടു.

അടിയന്തരാവസ്ഥക്കാലത്തെ തന്റെ അറസ്റ്റും ജയിൽപീഡനവും നിഷേധിക്കുന്നതിന് പകരം അതിന്റെ ചരിത്രപരമായ വസ്തുതകൾ അംഗീകരിച്ചുകൊണ്ടാണ് സ്റ്റാലിന്റെ പ്രതികരണം. തന്റെ വ്യക്തിപരമായ അനുഭവങ്ങളെ ഡി.എം.കെയുടെ ദീർഘകാല രാഷ്ട്രീയ പോരാട്ടത്തിന്റെ ഭാഗമായാണ് അദ്ദേഹം അവതരിപ്പിച്ചത്. അതേസമയം, ആ ചരിത്രത്തെ പരിഹസിക്കാനോ രാഷ്ട്രീയമായി ആയുധമാക്കാനോ ഉള്ള ശ്രമങ്ങൾക്കെതിരായ മറുപടി കൂടിയാണ് പുതിയ വിശദീകരണം.