സിഎംആർഎൽ മാസപ്പടി കേസിൽ തനിക്കെതിരെ എഫ്ഐആർ രജിസ്റ്റർ ചെയ്യണമെന്ന എൻഫോഴ്സ്മെന്റ് ഡയറക്ടറേറ്റിന്റെ (ഇഡി) ശുപാർശയെയും കൈക്കൂലി ആരോപണങ്ങളെയും മുൻ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയൻ തള്ളിക്കളഞ്ഞു. ആലപ്പുഴ മന്നാറിൽ സിപിഐ(എം) ലോക്കൽ കമ്മിറ്റി ഓഫീസ് ഉദ്ഘാടനം ചെയ്ത് സംസാരിക്കവെയായിരുന്നു അദ്ദേഹത്തിന്റെ രൂക്ഷ വിമർശനം.

തന്നെയും പാർട്ടിയെയും രാഷ്ട്രീയമായി തകർക്കാൻ ലക്ഷ്യമിട്ട് രാഷ്ട്രീയ യജമാനന്മാരുടെ നിർദേശപ്രകാരമാണ് ഇഡി ഉദ്യോഗസ്ഥർ തന്റെ വീട്ടിലെത്തിയതെന്ന് പിണറായി വിജയൻ ആരോപിച്ചു. പരിശോധനയിൽ ഒരു അഴിമതി വിവരവും കണ്ടെത്താൻ ഇഡിക്ക് കഴിഞ്ഞിട്ടില്ലെന്നും അദ്ദേഹം ചൂണ്ടിക്കാട്ടി.

മകൾ വീണ വിജയന്റെ കമ്പനിയായ എക്സാലോജിക്കും സിഎംആർഎല്ലും തമ്മിലുള്ള ഇടപാടുകൾ പൂർണമായും ബാങ്ക് വഴിയാണ് നടന്നതെന്നും, കൃത്യമായി നികുതി അടച്ചിട്ടുള്ളതാണെന്നും അതിൽ ഒരു രഹസ്യവുമില്ലെന്നും അദ്ദേഹം വ്യക്തമാക്കി. 3.28 കോടി രൂപ മകൾ വഴി കൈക്കൂലി വാങ്ങിയെന്ന ഇഡി റിപ്പോർട്ടും അനുബന്ധ മാധ്യമവാർത്തകളും രാഷ്ട്രീയലക്ഷ്യത്തോടെയുള്ള കള്ളക്കഥകളാണെന്ന് അദ്ദേഹം പറഞ്ഞു. മാധ്യമങ്ങൾ അച്ചുനിരത്തിയാൽ തകരുന്നതല്ല തന്റെ വ്യക്തിജീവിതമെന്നും, തന്റെ ജീവിതം ജനങ്ങൾക്കു മുന്നിൽ ഒരു തുറന്ന പുസ്തകമാണെന്നും അദ്ദേഹം കൂട്ടിച്ചേർത്തു.

ഇതിനിടെ ചെങ്ങന്നൂർ ഗസ്റ്റ് ഹൗസിൽ വെച്ച് കേസുമായി ബന്ധപ്പെട്ട് ചോദ്യങ്ങൾ ചോദിക്കാൻ ശ്രമിച്ച മാധ്യമപ്രവർത്തകരോട് പിണറായി വിജയൻ അതിരൂക്ഷമായി പ്രതികരിച്ചു. താൻ അവിടെ എത്തിയത് ശുചിമുറിയിൽ പോകാനാണെന്നും മാധ്യമങ്ങളെ കാണാനല്ലെന്നും പറഞ്ഞ അദ്ദേഹം, മാധ്യമപ്രവർത്തകരോട് പുറത്തുനിൽക്കാൻ ആവശ്യപ്പെടുകയും ചെയ്തു.

കരുവന്നൂർ സഹകരണ ബാങ്ക് കേസിലെ ഇഡി അന്വേഷണത്തെയും അദ്ദേഹം വിമർശിച്ചു. പ്രതികളെ സ്വാധീനിച്ച് ആവശ്യമായ രീതിയിൽ മാപ്പുസാക്ഷികളെക്കൊണ്ട് മൊഴി നൽകിപ്പിക്കുന്ന സാഹചര്യമാണ് നിലവിലുള്ളതെന്ന് ചങ്ങനാശ്ശേരിയിൽ നടന്ന മറ്റൊരു ചടങ്ങിൽ അദ്ദേഹം ആരോപിച്ചു.