തിരുവനന്തപുരം: തിരുവനന്തപുരം കോർപ്പറേഷനിലെ ശാസ്തമംഗലം വാർഡിൽ നിന്നുള്ള ബിജെപി കൗൺസിലറും മുൻ ഡിജിപിയുമായ ആർ. ശ്രീലേഖ കൗൺസിലർ സ്ഥാനം രാജിവെച്ചു. ഒക്ടോബർ 3-നാണ് രാജി സംബന്ധിച്ച വിവരം പുറത്തുവന്നത്. വ്യക്തിപരമായ കാരണങ്ങളാണ് രാജിക്ക് പിന്നിലെന്നാണ് ഔദ്യോഗിക വിശദീകരണമെങ്കിലും, കോർപ്പറേഷനിൽ മേയർ സ്ഥാനം ലഭിക്കാത്തതിലുള്ള കടുത്ത അതൃപ്തിയാണ് തീരുമാനത്തിന് പിന്നിലെന്നാണ് റിപ്പോർട്ടുകൾ.

സെപ്റ്റംബർ 30-ന് തന്നെ മേയർ വി.വി. രാജേഷിന് രാജിക്കത്ത് നൽകിയതായി ശ്രീലേഖ വാട്‌സാപ് ഗ്രൂപ്പിലൂടെ അറിയിച്ചിരുന്നു. എന്നാൽ കേരള മുനിസിപ്പാലിറ്റി നിയമപ്രകാരം കൗൺസിലറുടെ രാജി ഔദ്യോഗികമായി കോർപ്പറേഷൻ സെക്രട്ടറിക്കാണ് സമർപ്പിക്കേണ്ടത്. ഇതനുസരിച്ച് ഒക്ടോബർ 5 തിങ്കളാഴ്ച ജില്ലാ കളക്ടർക്കോ കോർപ്പറേഷൻ സെക്രട്ടറിക്കോ രാജിക്കത്ത് കൈമാറുമെന്നാണ് വിവരം.

കോർപ്പറേഷനിൽ ചെറിയ ഭൂരിപക്ഷത്തിൽ ഭരണം നടത്തുന്ന ബിജെപിക്ക് ശ്രീലേഖയുടെ രാജി രാഷ്ട്രീയ തിരിച്ചടിയായിരിക്കുകയാണ്. രാജി പ്രാബല്യത്തിൽ വരുന്നതോടെ കോർപ്പറേഷനിലെ ഭരണസമവാക്യങ്ങളിൽ ഉണ്ടാകാവുന്ന മാറ്റങ്ങളും ചർച്ചയാകുന്നുണ്ട്.

ശ്രീലേഖയെ അനുനയിപ്പിച്ച് രാജി പിൻവലിപ്പിക്കാനുള്ള ശ്രമങ്ങൾ ബിജെപി നേതൃത്വം ആരംഭിച്ചിട്ടുണ്ട്. എന്നാൽ ഇനിയുള്ള ചർച്ചകൾ മുൻ കേന്ദ്രമന്ത്രി രാജീവ് ചന്ദ്രശേഖറുമായി മാത്രമായിരിക്കുമെന്ന നിലപാടിലാണ് ശ്രീലേഖയെന്നാണ് റിപ്പോർട്ടുകൾ. രാജി പിൻവലിക്കുമോ എന്ന കാര്യത്തിൽ ഇതുവരെ വ്യക്തതയില്ല.