ജിബൂട്ടി: യെമനിലേക്ക് പോകുകയായിരുന്ന കുടിയേറ്റക്കാരുടെ ബോട്ട് ജിബൂട്ടി തീരത്ത് മുങ്ങി 139 പേർ മരിച്ചു. മരിച്ചവരിൽ 15 കുട്ടികളും ഉൾപ്പെടുന്നു. 305 പേരുമായി സഞ്ചരിച്ചിരുന്ന ബോട്ട് ഒക്ടോബർ 8, 9 തീയതികൾക്കിടയിലെ രാത്രിയിൽ ഒബോക്കിന് വടക്കുള്ള ഗുഹെറെ തീരത്തിനടുത്താണ് അപകടത്തിൽപ്പെട്ടത്. അന്താരാഷ്ട്ര കുടിയേറ്റ സംഘടനയായ ഐ.ഒ.എം. ആണ് ഇക്കാര്യം അറിയിച്ചത്.

അപകടത്തിൽപ്പെട്ടവരിൽ 82 പേരെ രക്ഷപ്പെടുത്തി. രക്ഷപ്പെട്ടവരെല്ലാം എത്യോപ്യൻ പൗരന്മാരാണ്. 84 പേരെ ഇനിയും കണ്ടെത്താനുണ്ടെന്നും ജിബൂട്ടി അധികൃതരുടെ നേതൃത്വത്തിൽ തിരച്ചിലും രക്ഷാപ്രവർത്തനവും തുടരുകയാണെന്നും ഐ.ഒ.എം. വ്യക്തമാക്കി.

രക്ഷപ്പെട്ടവരിൽ 64 പേർക്ക് ഒബോക്കിലെ കുടിയേറ്റ പ്രതികരണ കേന്ദ്രം വഴി ഐ.ഒ.എം. സഹായം നൽകുന്നുണ്ട്. വൈദ്യസഹായം, ഭക്ഷണം, താമസസൗകര്യം, കുടുംബാംഗങ്ങളുമായി ബന്ധപ്പെടാനുള്ള പിന്തുണ എന്നിവയാണ് ലഭ്യമാക്കുന്നത്.

ആഫ്രിക്കൻ രാജ്യമായ എത്യോപ്യയിൽനിന്ന് ജിബൂട്ടി വഴി യെമനിലേക്കും തുടർന്ന് ഗൾഫ് രാജ്യങ്ങളിലേക്കും തൊഴിൽ തേടി പോകുന്ന കുടിയേറ്റക്കാർ സഞ്ചരിക്കുന്ന പാതയിലാണ് അപകടം. ആഫ്രിക്കയുടെ കൊമ്പ് മേഖലയിൽനിന്ന് ബാബ് അൽ മന്ദബ് കടലിടുക്ക് കടന്നുള്ള ഈ കിഴക്കൻ കുടിയേറ്റ പാതയിൽ പ്രതിവർഷം പതിനായിരക്കണക്കിന് ആളുകളാണ് യാത്ര ചെയ്യുന്നത്.

സെപ്റ്റംബർ പകുതി മുതൽ എത്യോപ്യയിൽനിന്ന് ജിബൂട്ടിയിലേക്കുള്ള 20,000-ത്തിലധികം കുടിയേറ്റ നീക്കങ്ങൾ രേഖപ്പെടുത്തിയിട്ടുണ്ട്. അമിതമായി ആളുകളെ കയറ്റിയുള്ള അപകടകരമായ കടൽയാത്രകളും കടുത്ത യാത്രാസാഹചര്യങ്ങളും ഈ പാതയിൽ കുടിയേറ്റക്കാരുടെ ജീവന് വലിയ ഭീഷണിയാണ് ഉയർത്തുന്നത്.