കാസർകോട്: എസ്ഡിപിഐ പ്രവർത്തകൻ തളങ്കര കുന്നിലിലെ സൈനുൽ ആബിദ് (24) വധക്കേസിൽ വിചാരണ നേരിട്ട 21 ആർഎസ്എസ്–ബിജെപി പ്രവർത്തകരെയും കോടതി വെറുതെവിട്ടു. കാസർകോട് ജില്ലാ അഡീഷണൽ സെഷൻസ് കോടതി (മൂന്ന്) ജഡ്ജി അചിന്ത്യ രാജ് ഉണ്ണിയാണ് വിധി പ്രസ്താവിച്ചത്. പ്രോസിക്യൂഷന് പ്രതികൾക്കെതിരായ കുറ്റം തെളിയിക്കാൻ ആവശ്യമായ തെളിവുകൾ ഹാജരാക്കാൻ കഴിയാത്തതാണ് പ്രതികളെ വെറുതെവിടാൻ കാരണമായത്.

2014 ഡിസംബർ 22-ന് കാസർകോട് പഴയ ബസ് സ്റ്റാൻഡിന് സമീപം നടന്ന കൊലപാതകവുമായി ബന്ധപ്പെട്ട കേസിലാണ് വിധി. കുറ്റപത്രം സമർപ്പിച്ച് വർഷങ്ങൾക്കുശേഷമാണ് കേസിൽ നിർണായക വിധിയുണ്ടായത്.

2014 ഡിസംബർ 22-ന് രാത്രി 9.30-ഓടെയാണ് കേസിനാസ്പദമായ സംഭവം നടന്നത്. പഴയ ബസ് സ്റ്റാൻഡിന് സമീപമുള്ള കുടുംബത്തിന്റെ മെത്തക്കട അടയ്ക്കാൻ പിതാവ് കെ.എ. മുഹമ്മദ് കുഞ്ഞിയെ സഹായിക്കുകയായിരുന്നു സൈനുൽ ആബിദ്. ഈ സമയത്ത് ബൈക്കുകളിലെത്തിയ അക്രമിസംഘം കടയ്ക്കുള്ളിൽ കയറി ആബിദിനെ മാരകായുധങ്ങൾ ഉപയോഗിച്ച് വെട്ടിപ്പരിക്കേൽപ്പിക്കുകയായിരുന്നു.

ഗുരുതരമായി പരിക്കേറ്റ ആബിദ് ഡിസംബർ 23-ന് മംഗളൂരുവിലെ ആശുപത്രിയിൽവെച്ച് മരിച്ചു. വ്യക്തിവിരോധമാണ് കൊലപാതകത്തിന് കാരണമെന്നായിരുന്നു പൊലീസ് കുറ്റപത്രത്തിൽ വ്യക്തമാക്കിയിരുന്നത്.

കേസിലെ പ്രധാന ദൃക്‌സാക്ഷിയായിരുന്ന ആബിദിന്റെ പിതാവ് മുഹമ്മദ് കുഞ്ഞി വിചാരണ ആരംഭിക്കുന്നതിന് രണ്ടുവർഷം മുമ്പ് കർണാടകയിലുണ്ടായ വാഹനാപകടത്തിൽ മരിച്ചിരുന്നു. കൊലപാതകത്തിന് നേരിട്ട് സാക്ഷിയായിരുന്ന അദ്ദേഹത്തിന്റെ അഭാവം പ്രോസിക്യൂഷന് തിരിച്ചടിയായി.

അന്വേഷണഘട്ടത്തിൽ രേഖപ്പെടുത്തിയ മൊഴികളും തിരിച്ചറിയലുകളും മാത്രം അടിസ്ഥാനമാക്കി പ്രതികൾക്കെതിരായ കുറ്റം തെളിയിക്കാൻ കഴിയില്ലെന്ന് കോടതി വിലയിരുത്തി. തിരിച്ചറിയൽ പരേഡ് സംബന്ധിച്ച രേഖകൾ ഉൾപ്പെടെയുള്ള തെളിവുകൾ കോടതിയിൽ ഫലപ്രദമായി സ്ഥാപിക്കുന്നതിലും പ്രോസിക്യൂഷന് വീഴ്ച സംഭവിച്ചു.

അന്വേഷണത്തിന്റെ ആദ്യഘട്ടം മുതൽ പൊലീസിന് വീഴ്ചകളുണ്ടായെന്നും പ്രതികൾക്കെതിരായ കുറ്റം സംശയാതീതമായി തെളിയിക്കാൻ ആവശ്യമായ തെളിവുകൾ ഹാജരാക്കാൻ കഴിഞ്ഞില്ലെന്നും കോടതി നിരീക്ഷിച്ചതായാണ് വിവരം.

തെളിവുകളില്ലാതെ രാഷ്ട്രീയപ്രേരിതമായി കൃത്രിമ തെളിവുകൾ സൃഷ്ടിച്ചാണ് പ്രതികളെ ഉൾപ്പെടുത്തിയതെന്നായിരുന്നു പ്രതിഭാഗത്തിന്റെ വാദം. കേസിൽ പ്രതികൾക്കെതിരായ കുറ്റം തെളിയിക്കാൻ പ്രോസിക്യൂഷന് കഴിയാതിരുന്നതോടെ കോടതി എല്ലാവരെയും വെറുതെവിടുകയായിരുന്നു.

വിധിയിൽ കടുത്ത നിരാശയും വിഷമവുമുണ്ടെന്ന് സൈനുൽ ആബിദിന്റെ കുടുംബം പ്രതികരിച്ചു. പിതാവിന്റെ കൺമുന്നിൽ നടന്ന കൊലപാതകത്തിൽ പ്രതികളെയെല്ലാം വെറുതെവിട്ടത് നീതി ലഭിക്കാത്ത സാഹചര്യമാണെന്ന് കുടുംബം ചൂണ്ടിക്കാട്ടി.

പൊലീസിന്റെ അന്വേഷണത്തിലെ വീഴ്ചകളാണ് കേസിൽ പ്രതികൾ വെറുതെവിടപ്പെടാൻ കാരണമായതെന്നും കുടുംബം ആരോപിച്ചു. വിധിക്കെതിരെ ഹൈക്കോടതിയിൽ അപ്പീൽ നൽകുമെന്നും കുടുംബം വ്യക്തമാക്കി.