തിരുവനന്തപുരം: ഒരു ഇടവേളയ്ക്ക് ശേഷം മകൾക്കും മകളുടെ സുഹൃത്തിനുമൊപ്പം ‘ബത്‌ലഹേം കുടുംബ യൂണിറ്റ്’ സിനിമ കണ്ട് ആസ്വാദനക്കുറിപ്പുമായി മുഖ്യമന്ത്രി വി.ഡി. സതീശൻ. സിനിമയുടെ അവതരണരീതിയെയും കഥാപാത്രങ്ങളെയും അഭിനന്ദിച്ച അദ്ദേഹം, സംവിധായകൻ എ.ഡി. ഗിരീഷിനെയും നടൻ സംഗീത് പ്രതാപിനെയും ഫോണിൽ വിളിച്ച് അഭിനന്ദനങ്ങൾ അറിയിച്ചതായും വ്യക്തമാക്കി.
തിരക്കുകൾ കാരണം മാസത്തിൽ ഒരു സിനിമയെങ്കിലും കാണുന്ന പതിവ് മുടങ്ങിപ്പോയിരുന്നുവെന്ന് മുഖ്യമന്ത്രി സമൂഹമാധ്യമത്തിൽ പങ്കുവച്ച കുറിപ്പിൽ പറഞ്ഞു. ഏറെ നാളത്തെ ഇടവേളയ്ക്കു ശേഷം ഇന്നലെയാണ് ഒരു സിനിമ ഒറ്റയിരുപ്പിൽ കണ്ടത്. മകൾക്കും അവളുടെ സുഹൃത്തിനുമൊപ്പം ഏറെ ആസ്വദിച്ചാണ് ചിത്രം കണ്ടുതീർത്തതെന്നും അദ്ദേഹം കുറിച്ചു.
സിനിമയുടെ അവതരണരീതിയാണ് ചിത്രത്തെ വ്യത്യസ്തമാക്കുന്നതെന്ന് വി.ഡി. സതീശൻ അഭിപ്രായപ്പെട്ടു. ഒട്ടും മുഷിപ്പിക്കാതെ മുന്നോട്ടുപോയ ചിത്രം തന്റെ ചെറുപ്പകാലത്തെ ഓർമകളിലേക്ക് കൊണ്ടുപോയെന്നും അന്നത്തെ നാട്ടിൻപുറങ്ങളും അവിടുത്തെ മനുഷ്യരും സാധാരണ ജീവിതങ്ങളും പരസ്പരമുള്ള സ്നേഹവും ഊഷ്മളമായ പ്രണയവുമെല്ലാം സിനിമയിലൂടെ വീണ്ടും അനുഭവിക്കാനായെന്നും അദ്ദേഹം പറഞ്ഞു.
നായകനും നായികയുമായി എത്തുന്ന കഥാപാത്രങ്ങൾ മാത്രമല്ല, ഒന്നോ രണ്ടോ രംഗങ്ങളിൽ മാത്രം പ്രത്യക്ഷപ്പെടുന്ന കഥാപാത്രങ്ങൾ പോലും പ്രേക്ഷകമനസ്സിൽ ഇടംപിടിക്കുന്ന രീതിയിലാണ് ചിത്രത്തിന്റെ അവതരണമെന്ന് മുഖ്യമന്ത്രി വിലയിരുത്തി. സിനിമ പലയിടത്തും ചിരിപ്പിക്കുകയും ചില സന്ദർഭങ്ങളിൽ വിഷമിപ്പിക്കുകയും ചെയ്തുവെന്നും തുടക്കം മുതൽ അവസാനം വരെ ആസ്വദിച്ചാണ് കണ്ടതെന്നും അദ്ദേഹം വ്യക്തമാക്കി. ചിത്രത്തിന്റെ വിജയത്തിനു പിന്നിൽ മികച്ച കൂട്ടായ പ്രവർത്തനമാണുള്ളതെന്നും കുറിപ്പിൽ ചൂണ്ടിക്കാട്ടി.
സിനിമ കണ്ടശേഷം ആസ്വാദനക്കുറിപ്പ് എഴുതുന്നത് പതിവില്ലാത്ത കാര്യമാണെന്നും എന്നാൽ ചിത്രം നൽകിയ പുതുമയും ഉന്മേഷവുമാണ് കുറിപ്പെഴുതാൻ പ്രേരിപ്പിച്ചതെന്നും മുഖ്യമന്ത്രി പറഞ്ഞു.
സംവിധായകൻ എ.ഡി. ഗിരീഷിനെയും നടൻ സംഗീത് പ്രതാപിനെയും ഫോണിൽ വിളിച്ച് അഭിനന്ദനങ്ങൾ അറിയിച്ച അദ്ദേഹം, നടന്മാരായ നിവിൻ പോളിയെയും മമിത ബൈജുവിനെയും ഫോണിൽ ബന്ധപ്പെടാൻ കഴിഞ്ഞില്ലെന്നും കുറിച്ചു. ചിത്രത്തിലൂടെ തന്റെ മനസ്സിൽ ഇടംനേടിയ മറ്റൊരു കഥാപാത്രമായി ഗ്ലിക്സനെയും മുഖ്യമന്ത്രി പ്രത്യേകം പരാമർശിച്ചു. ‘പാവം ഗ്ലിക്സൻ’ എന്ന വാക്കുകളോടെയായിരുന്നു അദ്ദേഹത്തിന്റെ പരാമർശം.
സിനിമയ്ക്കായി പ്രവർത്തിച്ച എല്ലാവർക്കും അഭിനന്ദനങ്ങൾ അറിയിച്ചുകൊണ്ടാണ് മുഖ്യമന്ത്രി തന്റെ കുറിപ്പ് അവസാനിപ്പിച്ചത്.
