ന്യൂഡൽഹി: ഡൽഹിയിൽ വിദ്യാർത്ഥി പ്രതിഷേധവുമായി ബന്ധപ്പെട്ട് പൊലീസ് നൽകിയ പീസ് ബോണ്ടിൽ ഒപ്പിടില്ലെന്ന് ഓൾ ഇന്ത്യ സ്റ്റുഡന്റ്സ് അസോസിയേഷൻ (AISA) ദേശീയ പ്രസിഡന്റ് നേഹ ബോറ. ജനാധിപത്യപരമായ വിയോജിപ്പുകളെയും സമാധാനപരമായ പ്രതിഷേധങ്ങളെയും അടിച്ചമർത്താനുള്ള ശ്രമത്തിന്റെ ഭാഗമായാണ് പൊലീസ് നോട്ടീസ് നൽകിയതെന്ന് അവർ ആരോപിച്ചു. പീസ് ബോണ്ട് നടപടിയെ നിയമപരമായും രാഷ്ട്രീയമായും ചോദ്യം ചെയ്യുന്നത് തുടരുമെന്നും വാർത്താസമ്മേളനത്തിൽ നേഹ വ്യക്തമാക്കി.

മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഒക്ടോബർ 16ന് ഡൽഹിയിൽ നടന്ന ‘ലഹരാ ദോ തിരംഗ’ മാർച്ചിൽ പങ്കെടുത്തതിനെ തുടർന്നാണ് നേഹ ബോറയെ പൊലീസ് കസ്റ്റഡിയിലെടുത്തത്. ഇതിന് പിന്നാലെ ഒക്ടോബർ 17ന് ഭാരതീയ നാഗരിക് സുരക്ഷാ സംഹിതയുടെ (BNSS) സെക്ഷൻ 126 പ്രകാരം പൊലീസ് നോട്ടീസ് നൽകി. അന്വേഷണ കാലയളവിൽ സമാധാനം പാലിക്കുന്നതിനായി 10,000 രൂപയുടെ വ്യക്തിഗത ബോണ്ടും ഒരു ജാമ്യക്കാരനെയും ഹാജരാക്കേണ്ടതില്ലാത്തതിന്റെ കാരണം വ്യക്തമാക്കണമെന്നായിരുന്നു നോട്ടീസിലെ നിർദേശം.

നോട്ടീസിനെതിരെ നേഹ ബോറ സമർപ്പിച്ച ഹർജി ഒക്ടോബർ 23ന് ഡൽഹി ഹൈക്കോടതി തള്ളി. ഇത്തരം മുൻകരുതൽ നടപടികൾ സ്വീകരിക്കാൻ മജിസ്‌ട്രേറ്റിന് അധികാരമുണ്ടെന്ന് കോടതി നിരീക്ഷിച്ചു. അതേസമയം, കേസുമായി ബന്ധപ്പെട്ട എല്ലാ രേഖകളും ഹർജിക്കാരിക്ക് നൽകണമെന്നും നിർദേശിച്ചു.

വോട്ടർപട്ടികയിൽനിന്ന് ലക്ഷക്കണക്കിന് ആളുകളെ ഒഴിവാക്കിയെന്ന ആരോപണത്തിൽ ചോദ്യങ്ങൾ ഉന്നയിക്കുന്നത് എങ്ങനെയാണ് പൊതുസമാധാന ലംഘനമാകുന്നതെന്ന് നേഹ വാർത്താസമ്മേളനത്തിൽ ചോദിച്ചു. ഭരണാധികാരികളോട് ചോദ്യങ്ങൾ ചോദിക്കാനും നയങ്ങളോട് വിയോജിപ്പ് പ്രകടിപ്പിക്കാനുമുള്ള അവകാശം ജനാധിപത്യത്തിന്റെ അടിസ്ഥാനമാണെന്നും അവർ പറഞ്ഞു.

വോട്ട് ചെയ്യാനുള്ള അവകാശവും സമാധാനപരമായി പ്രതിഷേധിക്കാനുള്ള സ്വാതന്ത്ര്യവും സംരക്ഷിക്കണമെന്ന ആവശ്യവുമായാണ് തെരുവിലിറങ്ങിയതെന്ന് നേഹ വ്യക്തമാക്കി. പ്രതിഷേധക്കാർക്കെതിരെ പൊലീസ് അതിക്രമം നടത്തിയെന്നും അവർ ആരോപിച്ചു.

പീസ് ബോണ്ടിൽ ഒപ്പിടില്ലെന്ന നിലപാടിലൂടെ പൊലീസ് നടപടിക്കെതിരായ നിയമപോരാട്ടം തുടരുമെന്നാണ് നേഹ ബോറ വ്യക്തമാക്കിയിരിക്കുന്നത്. പ്രതിഷേധിക്കാനുള്ള അവകാശവും പൊതുസമാധാനം ഉറപ്പാക്കാനുള്ള നിയമപരമായ നടപടികളും തമ്മിലുള്ള തർക്കം സംഭവത്തോടെ വീണ്ടും ചർച്ചയാകുകയാണ്.