കൊല്ലം: കഴിഞ്ഞ ദിവസങ്ങളിൽ പെയ്ത കനത്ത മഴയിൽ ചാത്തന്നൂരിൽ ദേശീയപാതയും സർവീസ് റോഡുകളും വെള്ളത്തിനടിയിലായി. വ്യാപകമായ വെള്ളക്കെട്ടിനെത്തുടർന്ന് ഗതാഗതം തടസ്സപ്പെടുകയും നിരവധി കടകളിലും വീടുകളിലും അപ്പാർട്ട്മെന്റുകളിലും വെള്ളം കയറി നാശനഷ്ടങ്ങൾ സംഭവിക്കുകയും ചെയ്തു.
ചാത്തന്നൂർ ജങ്ഷൻ, കനറാ ബാങ്കിന് സമീപം, ഹൈസ്കൂൾ ജങ്ഷൻ, എൽ.എം. മാളിന് സമീപം തുടങ്ങിയ സ്ഥലങ്ങളിലാണ് രൂക്ഷമായ വെള്ളക്കെട്ടുണ്ടായത്. ദേശീയപാതയിലും സർവീസ് റോഡുകളിലും മൂന്നടിയോളം ഉയരത്തിൽ വെള്ളം കയറിയതോടെ വാഹനയാത്രക്കാർ ദുരിതത്തിലായി. കാറുകളും ഓട്ടോറിക്ഷകളും ഉൾപ്പെടെ നിരവധി വാഹനങ്ങൾ വെള്ളക്കെട്ടിൽ കുടുങ്ങി. ഓട്ടോറിക്ഷയിൽ കുടുങ്ങിയവരെയും മറ്റു യാത്രക്കാരെയും നാട്ടുകാരും അഗ്നിരക്ഷാസേനയും ചേർന്ന് രക്ഷപ്പെടുത്തി.
ഇരുപത്തിയഞ്ചിലധികം കടകളിലും അപ്പാർട്ട്മെന്റുകളിലും വീടുകളിലും വെള്ളം കയറിയതായാണ് വിവരം. വെള്ളം കയറിയതിനെത്തുടർന്ന് വിവിധ സ്ഥാപനങ്ങളിലെ യന്ത്രങ്ങളും ഭക്ഷ്യോൽപ്പന്നങ്ങളും നശിച്ചു. കുത്തൊഴുക്കിൽ നിരവധി വീടുകളുടെ ചുറ്റുമതിലുകൾക്കും ഇടറോഡുകൾക്കും കേടുപാടുകൾ സംഭവിക്കുകയും ചെയ്തു. വ്യാപാര സ്ഥാപനങ്ങൾക്കും പ്രദേശവാസികൾക്കും വെള്ളക്കെട്ട് വലിയ സാമ്പത്തിക നഷ്ടമാണ് വരുത്തിവെച്ചത്.
ദേശീയപാത വികസനം പൂർത്തിയായിട്ടും മഴവെള്ളം സുഗമമായി ഒഴുകിപ്പോകുന്നതിനുള്ള ശാസ്ത്രീയമായ ഓടകളുടെയും ഡ്രെയിനേജ് സംവിധാനങ്ങളുടെയും അഭാവമാണ് വെള്ളക്കെട്ടിന് പ്രധാന കാരണമായി ചൂണ്ടിക്കാണിക്കപ്പെടുന്നത്. മഴ പെയ്യുമ്പോൾ വെള്ളം കെട്ടിനിൽക്കുന്ന സാഹചര്യം ഒഴിവാക്കാൻ ഫലപ്രദമായ ജലനിർഗമന സംവിധാനം ഒരുക്കണമെന്ന ആവശ്യം ശക്തമാണ്.
കനത്ത മഴയുണ്ടാകുമ്പോൾ ആവർത്തിക്കുന്ന വെള്ളക്കെട്ടിന് ശാശ്വത പരിഹാരം കാണാൻ ബന്ധപ്പെട്ട അധികൃതർ അടിയന്തര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.
