തിരുവല്ല: നേപ്പാളിലെ എവറസ്റ്റ് മേഖലയിലുള്ള ലോബുചെ പർവതത്തിൽ ട്രക്കിങ്ങിനിടെ അപകടത്തിൽപ്പെട്ട് മഞ്ഞുമലയിൽ കുടുങ്ങിയ മലയാളി പർവതാരോഹക സീന സാറ മജ്നുവിന്റെ (41) സ്ഥാനം കണ്ടെത്തിയതായി വിവരം ലഭിച്ചു. തിരുവല്ല മഞ്ഞാടി സ്വദേശിനിയായ സീനയെ സുരക്ഷിതമായി താഴെയെത്തിക്കുന്നതിനുള്ള രക്ഷാപ്രവർത്തനം ഇന്ത്യൻ എംബസിയുടെയും നേപ്പാൾ അധികൃതരുടെയും ഏകോപനത്തിൽ പുരോഗമിക്കുകയാണ്.

ലോബുചെ പർവതത്തിലെ ട്രക്കിങ് ദൗത്യം പൂർത്തിയാക്കി മടങ്ങുന്നതിനിടെയാണ് സീന അപകടത്തിൽപ്പെട്ടത്. മഞ്ഞുമൂടിയ ദുർഘടമായ പാതയിലൂടെ താഴേക്ക് ഇറങ്ങുന്നതിനിടെ കാൽവഴുതി വീണ സീനയുടെ കൈയ്ക്ക് പരിക്കേൽക്കുകയായിരുന്നു. പരിക്കിനെ തുടർന്ന് മുന്നോട്ടുനീങ്ങാൻ കഴിയാതെ വന്നതോടെ സീന മഞ്ഞുമലയിൽ ഒറ്റപ്പെട്ടു. ഒപ്പമുണ്ടായിരുന്ന ഷെർപ്പ ഗൈഡ് മുന്നോട്ടുപോയതിന് പിന്നാലെ കാണാതായതായും റിപ്പോർട്ടുകളുണ്ട്.

ഒക്ടോബർ 21നാണ് സീന കേരളത്തിൽനിന്ന് നേപ്പാളിലേക്ക് യാത്ര തിരിച്ചത്. ഒക്ടോബർ 23ന് പർവതാരോഹണം ആരംഭിച്ചു. ചൊവ്വാഴ്ച സീന അവസാനമായി കുടുംബാംഗങ്ങളുമായി ഫോണിൽ സംസാരിച്ചിരുന്നു. തുടർന്ന് താൻ അപകടത്തിൽപ്പെട്ട് മഞ്ഞുമലയിൽ കുടുങ്ങിക്കിടക്കുകയാണെന്നും അടിയന്തര സഹായം ആവശ്യമാണെന്നും വ്യക്തമാക്കുന്ന വീഡിയോ സന്ദേശവും പുറത്തുവിട്ടിരുന്നു.

സീനയുടെ ദുരവസ്ഥ അറിഞ്ഞതോടെ കുടുംബാംഗങ്ങൾ അധികൃതരുമായി ബന്ധപ്പെട്ട് അടിയന്തര രക്ഷാപ്രവർത്തനം ആവശ്യപ്പെട്ടു. കേരളത്തിലെ രാഷ്ട്രീയ നേതാക്കളും ജനപ്രതിനിധികളും വിഷയത്തിൽ ഇടപെട്ട് കേന്ദ്ര വിദേശകാര്യ മന്ത്രാലയത്തെയും കാഠ്മണ്ഡുവിലെ ഇന്ത്യൻ എംബസിയെയും വിവരമറിയിച്ചു. ഇതേത്തുടർന്നാണ് നേപ്പാളിലെ പ്രാദേശിക അധികൃതരുടെയും രക്ഷാപ്രവർത്തകരുടെയും സഹായത്തോടെ തിരച്ചിൽ ഊർജിതമാക്കിയത്.

പുതിയ വിവരങ്ങൾ പ്രകാരം സീന കുടുങ്ങിക്കിടക്കുന്ന സ്ഥലം രക്ഷാസംഘം തിരിച്ചറിഞ്ഞിട്ടുണ്ട്. ദുർഘടമായ മഞ്ഞുമല പ്രദേശത്ത് എത്തിച്ചേരുന്നതിനായി പരിചയസമ്പന്നരായ നേപ്പാളി ഷെർപ്പമാരുടെയും പ്രാദേശിക രക്ഷാസംഘങ്ങളുടെയും സഹായം തേടിയിരിക്കുകയാണ്. ഉയർന്ന പ്രദേശങ്ങളിലെ പ്രതികൂല കാലാവസ്ഥയും അതിശൈത്യവും രക്ഷാപ്രവർത്തനത്തിന് വെല്ലുവിളിയാണ്.

കൈയ്ക്ക് പരിക്കേറ്റ സീനയ്ക്ക് സ്വയം താഴേക്ക് ഇറങ്ങാൻ കഴിയാത്ത സാഹചര്യത്തിൽ എത്രയും വേഗം അവർക്കരികിലെത്തി ആവശ്യമായ വൈദ്യസഹായം ലഭ്യമാക്കുന്നതിനാണ് മുൻഗണന നൽകുന്നത്. രക്ഷപ്പെടുത്തിയശേഷം സുരക്ഷിതമായ സ്ഥലത്തേക്കോ ചികിത്സാകേന്ദ്രത്തിലേക്കോ മാറ്റുന്നതിനുള്ള നടപടികളും ഏകോപിപ്പിക്കുന്നുണ്ട്.

സീന സാറ മജ്നു പർവതാരോഹകയും ഏകാന്ത സഞ്ചാരിയും കോളേജ് ഡയറക്ടറുമാണ്. സാഹസിക യാത്രകളിൽ താൽപര്യമുള്ള സീനയുടെ രക്ഷാപ്രവർത്തനവുമായി ബന്ധപ്പെട്ട വിവരങ്ങൾക്കായി കുടുംബാംഗങ്ങളും നാട്ടുകാരും കാത്തിരിക്കുകയാണ്.