ന്യൂഡൽഹി: ജമ്മു കശ്മീർ മുഖ്യമന്ത്രി ഒമർ അബ്ദുള്ളയും പ്രമുഖ ടെലിവിഷൻ മാധ്യമപ്രവർത്തക നിധി റസ്ദാനും വിവാഹിതരായി. ന്യൂഡൽഹിയിൽ വെള്ളിയാഴ്ച സ്പെഷ്യൽ മാരേജ് ആക്ട് പ്രകാരമായിരുന്നു വിവാഹം. വിവാഹവിവരം ഒമർ അബ്ദുള്ള ശനിയാഴ്ച സമൂഹമാധ്യമമായ എക്സിലൂടെ പങ്കുവെച്ചു.

‘ഇന്നലെ ഒരു പുതിയ യാത്ര ആരംഭിച്ചു…’ എന്ന കുറിപ്പിനൊപ്പം നിധി റസ്ദാനെ ടാഗ് ചെയ്തുകൊണ്ടായിരുന്നു ഒമറിന്റെ പോസ്റ്റ്. ഇരുവരും ഒന്നിച്ചുള്ള നാല് ചിത്രങ്ങളും അദ്ദേഹം പങ്കുവെച്ചിട്ടുണ്ട്. ഇരുവരുടെയും കുടുംബാംഗങ്ങൾ ചടങ്ങിൽ സാക്ഷികളായി പങ്കെടുത്തു.

ഒമർ അബ്ദുള്ളയുടെ ആദ്യ വിവാഹബന്ധം സുപ്രീംകോടതി ഉത്തരവിനെത്തുടർന്ന് ഈ വർഷം ജൂലൈയിൽ അവസാനിച്ചിരുന്നു. ആദ്യ ഭാര്യ പായലുമായുള്ള വിവാഹബന്ധം പരസ്പര ധാരണയെത്തുടർന്നാണ് നിയമപരമായി വേർപെടുത്തിയത്. 56 വയസ്സുകാരനായ ഒമർ അബ്ദുള്ളയുടെ രണ്ടാം വിവാഹമാണിത്. 49 വയസ്സുകാരിയായ നിധി റസ്ദാന്റേതും രണ്ടാം വിവാഹമാണ്.

ശ്രീനഗറിലും ന്യൂഡൽഹിയിലുമായി നടന്ന വിവാഹാഘോഷങ്ങളിൽ ഇരുവരുടെയും കുടുംബാംഗങ്ങളും അടുത്ത ബന്ധുക്കളും പങ്കെടുത്തു. ഒമറിന്റെ മാതാപിതാക്കളായ ഫാറൂഖ് അബ്ദുള്ളയും മോളിയും മൂന്ന് സഹോദരിമാരും മറ്റ് അടുത്ത ബന്ധുക്കളും ചടങ്ങുകളിലെത്തി. നിധിയുടെ മാതാപിതാക്കളായ മുതിർന്ന മാധ്യമപ്രവർത്തകൻ എം.കെ. റസ്ദാനും സരള റസ്ദാനും കുടുംബാംഗങ്ങൾക്കൊപ്പം പങ്കെടുത്തു.