കോഴിക്കോട്: പന്തീരങ്കാവ് ബൈപ്പാസ് ജംഗ്ഷനിലെ നീണ്ടനാളത്തെ യാത്രാദുരിതത്തിന് പരിഹാരം കാണുന്നതിന്റെ ഭാഗമായി മേൽപ്പാലത്തിനടിയിൽ ക്രോസ് റോഡുകളുടെ നിർമാണം ആരംഭിച്ചു. പ്രദേശത്തെ രൂക്ഷമായ ഗതാഗതക്കുരുക്ക് കുറയ്ക്കാൻ ലക്ഷ്യമിട്ടാണ് സമാന്തര റോഡുകളുടെ നിർമാണം ആരംഭിച്ചിരിക്കുന്നത്.
കുന്നമംഗലം എംഎൽഎ എം.എ. റസാഖ് മാസ്റ്ററാണ് ഇക്കാര്യം അറിയിച്ചത്. കഴിഞ്ഞ സെപ്റ്റംബർ 11ന് എം.കെ. രാഘവൻ എംപിയോടൊപ്പം വിളിച്ചുചേർത്ത ഉന്നതതല യോഗത്തിലെ തീരുമാനങ്ങളുടെ അടിസ്ഥാനത്തിലാണ് നിർമാണ പ്രവർത്തനങ്ങൾ പുരോഗമിക്കുന്നതെന്ന് അദ്ദേഹം വ്യക്തമാക്കി.
ക്രോസ് റോഡുകൾ യാഥാർഥ്യമാകുന്നതോടെ പന്തീരങ്കാവ് ബൈപ്പാസ് ജംഗ്ഷനിലെ ഗതാഗതക്കുരുക്കിന് വലിയൊരളവിൽ പരിഹാരമാകുമെന്നാണ് പ്രതീക്ഷ. ദീർഘകാലമായി പ്രദേശവാസികളും യാത്രക്കാരും നേരിട്ടുവരുന്ന യാത്രാപ്രശ്നങ്ങൾക്ക് നിർമാണം പൂർത്തിയാകുന്നതോടെ ആശ്വാസമുണ്ടാകുമെന്നും എംഎൽഎ അറിയിച്ചു.
