
ഇന്ത്യയുടെ ടാങ്കർ കപ്പൽ കയറ്റുമതിയിൽ വൻ മുന്നേറ്റം. 2026-27 സാമ്പത്തിക വർഷത്തിലെ ഏപ്രിൽ മുതൽ ജൂൺ വരെയുള്ള ആദ്യ പാദത്തിൽ കപ്പൽ കയറ്റുമതി വരുമാനം ആറിരട്ടിയിലധികമായി വർധിച്ച് 1.36 ബില്യൺ ഡോളറിലെത്തി. മുൻ സാമ്പത്തിക വർഷം ഇതേ കാലയളവിൽ 221.1 ദശലക്ഷം ഡോളറായിരുന്നു കയറ്റുമതി വരുമാനം.
കയറ്റുമതി ചെയ്ത കപ്പലുകളുടെ എണ്ണത്തിലും ഗണ്യമായ വർധനയുണ്ടായി. കഴിഞ്ഞ വർഷം ആദ്യ പാദത്തിൽ 10 കപ്പലുകളാണ് കയറ്റുമതി ചെയ്തതെങ്കിൽ ഇത്തവണ അത് 29 ആയി ഉയർന്നു. ഇന്ത്യൻ കപ്പൽ നിർമാണ മേഖലയിലെ വളർച്ചയുടെ സൂചനയായാണ് ഈ നേട്ടം വിലയിരുത്തപ്പെടുന്നത്.
സംസ്ഥാനാടിസ്ഥാനത്തിലുള്ള കണക്കുകളിൽ ഗുജറാത്താണ് മുന്നിൽ. 1.11 ബില്യൺ ഡോളറിന്റെ കയറ്റുമതിയുമായി രാജ്യത്തെ മൊത്തം കപ്പൽ കയറ്റുമതി വരുമാനത്തിന്റെ 80 ശതമാനത്തിലധികം ഗുജറാത്ത് സ്വന്തമാക്കി. മഹാരാഷ്ട്ര, പശ്ചിമ ബംഗാൾ, ഡൽഹി എന്നിവയാണ് കയറ്റുമതിയിൽ മറ്റ് പ്രധാന സംഭാവന നൽകിയ മേഖലകൾ.

വിദേശ വിപണികളിൽ ഇന്ത്യയുടെ കപ്പലുകൾക്ക് ആവശ്യക്കാരേറുകയാണ്. യുഎഇ, സിംഗപ്പൂർ, ഒമാൻ തുടങ്ങിയ പരമ്പരാഗത വിപണികൾക്കൊപ്പം ശ്രീലങ്ക, ഈജിപ്ത്, വിയറ്റ്നാം തുടങ്ങിയ പുതിയ വിപണികളിലേക്കും ഇന്ത്യൻ കപ്പലുകൾ എത്തി.
പുതിയ രാജ്യങ്ങളിലേക്ക് കയറ്റുമതി വ്യാപിപ്പിക്കാനായത് ഇന്ത്യൻ കപ്പൽ നിർമാണ വ്യവസായത്തിന്റെ ആഗോള സാന്നിധ്യം വർധിപ്പിക്കാൻ സഹായിക്കുന്നതാണ്. കപ്പൽ നിർമാണത്തിലും കയറ്റുമതിയിലും ഇന്ത്യയുടെ വളർച്ചയ്ക്ക് ഈ മുന്നേറ്റം കൂടുതൽ കരുത്തുപകരുമെന്നാണ് വിലയിരുത്തൽ.