കോതമംഗലം: ഫർണിച്ചർ നിർമാണ മേഖലയിലെ പാരമ്പര്യവും സാധ്യതകളും പ്രയോജനപ്പെടുത്തി പ്രാദേശിക വികസനത്തിന് പുതിയ അവസരങ്ങൾ സൃഷ്ടിക്കുക എന്ന ലക്ഷ്യത്തോടെ നെല്ലിക്കുഴിയിൽ ഒരു മാസം നീളുന്ന ഫർണിച്ചർ ഫെസ്റ്റ് സംഘടിപ്പിക്കാൻ ഒരുങ്ങുന്നു. ഫെസ്റ്റിന്റെ സംഘാടനവുമായി ബന്ധപ്പെട്ട ആദ്യ യോഗം ചേർന്നതായി എംഎൽഎ ഷിബു തെക്കുംപുറം അറിയിച്ചു.
സിമ്പോസിയങ്ങൾ, സെമിനാറുകൾ, കലാപരിപാടികൾ, നിക്ഷേപക സംഗമം, ബിസിനസ് മീറ്റ് തുടങ്ങിയവ ഉൾപ്പെടുത്തിയാണ് ഫെസ്റ്റ് സംഘടിപ്പിക്കാൻ ലക്ഷ്യമിടുന്നത്. ഫർണിച്ചർ നിർമാണ മേഖലയിൽ കേരളത്തിന് തന്നെ മാതൃകയായ നെല്ലിക്കുഴിയുടെ വ്യവസായ പാരമ്പര്യം കൂടുതൽ പ്രയോജനപ്പെടുത്താനും മേഖലയിലെ സംരംഭകർക്ക് പുതിയ അവസരങ്ങൾ ഒരുക്കാനുമാണ് പദ്ധതിയിലൂടെ ലക്ഷ്യമിടുന്നത്.
ഫെസ്റ്റിന്റെ നടത്തിപ്പിനായി ചേർന്ന ആദ്യ യോഗത്തിൽ നെല്ലിക്കുഴി പഞ്ചായത്ത് പ്രസിഡന്റ് സനീറ നസീറിനെ സംഘാടക സമിതി ചെയർമാനായും പഞ്ചായത്ത് വൈസ് പ്രസിഡന്റ് അബു കൊട്ടാരത്തെ കൺവീനറായും തെരഞ്ഞെടുത്തു. ഫെസ്റ്റിന്റെ തുടർപ്രവർത്തനങ്ങൾ ഏകോപിപ്പിക്കുന്നതിനുള്ള നടപടികൾ ഇതോടെ ആരംഭിച്ചു.
നെല്ലിക്കുഴി ഫർണിച്ചറിന് ഭൗമസൂചികാ പദവി (ജിയോഗ്രഫിക്കൽ ഇൻഡിക്കേഷൻ–ജി.ഐ.) ലഭ്യമാക്കുന്നതിനുള്ള ശ്രമങ്ങളും ഇതോടൊപ്പം നടത്തുമെന്ന് ഷിബു തെക്കുംപുറം വ്യക്തമാക്കി. ജി.ഐ. പദവി ലഭിക്കുന്നതിലൂടെ നെല്ലിക്കുഴിയുടെ ഫർണിച്ചർ നിർമാണ പാരമ്പര്യത്തിന് ഔദ്യോഗിക അംഗീകാരം നേടാനും ഉൽപ്പന്നങ്ങളുടെ തനിമയും പ്രാദേശിക സ്വത്വവും ഉയർത്തിക്കാട്ടാനും സാധിക്കുമെന്നാണ് പ്രതീക്ഷ.
നെല്ലിക്കുഴിയുടെ ഫർണിച്ചർ വ്യവസായത്തിന്റെ സാധ്യതകൾ പരമാവധി പ്രയോജനപ്പെടുത്തി നാടിന്റെ സാമ്പത്തിക വളർച്ചയ്ക്കും തൊഴിലവസരങ്ങൾ വർധിപ്പിക്കുന്നതിനും സഹായകമായ വേദിയായി ഫെസ്റ്റിനെ മാറ്റുകയാണ് ലക്ഷ്യമെന്നും എംഎൽഎയുടെ പോസ്റ്റിൽ വ്യക്തമാക്കുന്നു.
