നിയാഗ്ര-ഓൺ-ദി-ലേക്ക് (കാനഡ): ഇന്ത്യൻ സ്ക്വാഷിന് അഭിമാന നിമിഷം സമ്മാനിച്ച് ലോക ജൂനിയർ വനിതാ സ്ക്വാഷ് ചാമ്പ്യൻഷിപ്പിൽ കിരീടം നേടി ചരിത്രം കുറിച്ച് അനാഹത് സിങ്. 2026 ലോക ജൂനിയർ സ്ക്വാഷ് ചാമ്പ്യൻഷിപ്പിന്റെ ഗേൾസ് സിംഗിൾസ് ഫൈനലിൽ ഈജിപ്തിന്റെ റുകയ്യ സലേമിനെ നേരിട്ടുള്ള മൂന്ന് ഗെയിമുകൾക്ക് (11-3, 11-7, 11-9) തോൽപ്പിച്ചാണ് ഒന്നാം സീഡായിരുന്ന 18-കാരി അനാഹത് ഇന്ത്യയുടെ ആദ്യ ജൂനിയർ ലോക സ്ക്വാഷ് ചാമ്പ്യനായത്.
ഈ നേട്ടത്തിന് മറ്റൊരു പ്രത്യേകതയും ഉണ്ട്. കഴിഞ്ഞ 16 വർഷമായി ലോക ജൂനിയർ വനിതാ സ്ക്വാഷ് കിരീടം ഈജിപ്ത് താരങ്ങളായിരുന്നു സ്വന്തമാക്കിയത്. ആ ആധിപത്യം അവസാനിപ്പിച്ച അനാഹത്, ടൂർണമെന്റിലുടനീളം ഒരു ഗെയിം പോലും നഷ്ടപ്പെടുത്താതെയാണ് സ്വർണമെഡലിലേക്ക് കുതിച്ചത്.
ഇന്ത്യൻ സ്ക്വാഷിന്റെ ഭാവി പ്രതീക്ഷയായി വിലയിരുത്തപ്പെടുന്ന അനാഹത് നിലവിൽ സീനിയർ പി.എസ്.എ. ടൂറിൽ ലോക റാങ്കിങ്ങിൽ 20-ാം സ്ഥാനത്താണ്. ഈ ചരിത്രവിജയത്തോടെ രാജ്യത്തിന്റെ സ്ക്വാഷ് രംഗത്തിന് പുതിയ ആത്മവിശ്വാസമാണ് ലഭിച്ചിരിക്കുന്നത്.
പുരുഷ വിഭാഗത്തിൽ നിലവിലെ ഏഷ്യൻ ജൂനിയർ ചാമ്പ്യനായ ആര്യവീർ ദേവാനാണ് ഇന്ത്യയുടെ മികച്ച പ്രകടനം കാഴ്ചവെച്ചത്. അദ്ദേഹം പ്രീക്വാർട്ടർ (അവസാന 16) വരെ മുന്നേറി. യുഷ നഫീസും ഗുർവീർ സിംഗും അവസാന 32-ൽ പുറത്തായപ്പോൾ, പുരവ് രംഭിയ അവസാന 64-ൽ തന്നെ ടൂർണമെന്റിൽ നിന്ന് പുറത്തായി.
2028-ൽ ലോസ് ആഞ്ചലസ് ഒളിമ്പിക്സിലൂടെ സ്ക്വാഷ് ആദ്യമായി ഒളിമ്പിക് ഇനമാകാനിരിക്കെ, ഈ ചരിത്രവിജയം അനാഹത് സിങ്ങിനും ഇന്ത്യൻ സ്ക്വാഷിനും വലിയ ആത്മവിശ്വാസം പകരുന്നതായാണ് കായികലോകം വിലയിരുത്തുന്നത്.
