ന്യൂഡൽഹി: സെപ്റ്റംബർ 28 മുതൽ 30 വരെ യുണൈറ്റഡ് ഫോറം ഓഫ് ബാങ്ക് യൂണിയൻസ് (യുഎഫ്ബിയു) ആഹ്വാനം ചെയ്തിരിക്കുന്ന മൂന്ന് ദിവസത്തെ രാജ്യവ്യാപക ബാങ്ക് പണിമുടക്കിന്റെ പശ്ചാത്തലത്തിൽ ഉപഭോക്താക്കളുടെ ബാങ്കിങ് ആവശ്യങ്ങൾ തടസ്സപ്പെടാതിരിക്കാൻ സർക്കാർ അടിയന്തര നടപടികൾ സ്വീകരിച്ചു.

സെപ്റ്റംബർ 26, 27 തീയതികളിലെ വാരാന്ത്യ അവധികൾക്ക് പിന്നാലെയാണ് സെപ്റ്റംബർ 28 മുതൽ 30 വരെ പണിമുടക്ക് പ്രഖ്യാപിച്ചിരിക്കുന്നത്. തുടർച്ചയായി ബാങ്കിങ് സേവനങ്ങൾ തടസ്സപ്പെടുന്ന സാഹചര്യം ഒഴിവാക്കുന്നതിനായി സെപ്റ്റംബർ 27 ഞായറാഴ്ച എല്ലാ പൊതുമേഖലാ ബാങ്കുകളും പ്രാദേശിക ഗ്രാമീണ ബാങ്കുകളും സാധാരണ നിലയിൽ പ്രവർത്തിക്കുമെന്ന് സർക്കാർ അറിയിച്ചു.

റിസർവ് ബാങ്ക് ഓഫ് ഇന്ത്യയുടെ അനുമതിയോടെയാണ് നടപടി. സെപ്റ്റംബർ 27ന് എല്ലാ ബാങ്ക് ശാഖകളും ഓഫീസുകളും എടിഎം-ലിങ്ക് ചെയ്ത ശാഖകളും കറൻസി ചെസ്റ്റുകളും പൂർണമായും പ്രവർത്തനസജ്ജമായി നിലനിർത്തും.

ബാങ്ക് ഉപഭോക്താക്കളുടെ ക്ഷേമവും സൗകര്യവും സർക്കാരിന്റെ പ്രധാന പരിഗണനയാണെന്ന് ബന്ധപ്പെട്ട വകുപ്പ് വ്യക്തമാക്കി. നിർദിഷ്ട പണിമുടക്ക് മാറ്റിവയ്ക്കണമെന്ന് ബാങ്ക് യൂണിയനുകളോടും ബാങ്ക് മാനേജ്മെന്റുകളോടും സർക്കാർ അഭ്യർഥിച്ചിട്ടുണ്ട്.

അവശ്യ ബാങ്കിങ് സേവനങ്ങൾ തടസ്സമില്ലാതെ തുടരുന്നതിനുള്ള നടപടികളും സ്വീകരിച്ചിട്ടുണ്ടെന്ന് സർക്കാർ അറിയിച്ചു.