പരസ്യ ചിത്രീകരണത്തിനിടെ ദാരുണം; പെരുമ്പാവൂരിലെ പാറമടയിൽ വീണ് ഡൽഹി സ്വദേശി മരിച്ചു
കൊച്ചി: എറണാകുളം ജില്ലയിലെ പെരുമ്പാവൂർ മുടക്കുഴ വെട്ടമലയിലെ വെള്ളക്കെട്ട് നിറഞ്ഞ പാറമടയിൽ നടന്ന അപകടത്തിൽ ഡൽഹി സ്വദേശി മരിച്ചു. ഡൽഹി അംബേദ്കർ നഗർ സ്വദേശിയായ ദിയാൻഷൂ ജോഷി (26) ആണ് മരിച്ചത്. മോഡലായിരുന്ന ദിയാൻഷൂ ഒരു പരസ്യ ചിത്രീകരണവുമായി ബന്ധപ്പെട്ട സംഘത്തോടൊപ്പമാണ് സ്ഥലത്തെത്തിയത്.
വ്യാഴാഴ്ച രാവിലെയോടെയായിരുന്നു സംഭവം. ചിത്രീകരണത്തിനായുള്ള ലൊക്കേഷൻ പരിശോധിക്കുന്നതിനും ഷൂട്ടിംഗിനുമായി എത്തിയ സംഘം വെട്ടമലയിലെ പാറമട പ്രദേശത്ത് സമയം ചെലവഴിക്കുന്നതിനിടെയാണ് അപകടമുണ്ടായതെന്നാണ് ലഭിക്കുന്ന വിവരം. പാറമടയിലെ വെള്ളക്കെട്ടിൽ ദിയാൻഷൂ നീന്താൻ ഇറങ്ങിയപ്പോഴാണ് അപകടം സംഭവിച്ചതെന്ന് പ്രാഥമിക അന്വേഷണത്തിൽ വ്യക്തമായിട്ടുണ്ട്.
അപകട വിവരം ലഭിച്ചതിനെ തുടർന്ന് നാട്ടുകാരും രക്ഷാപ്രവർത്തകരും സ്ഥലത്തെത്തി തിരച്ചിൽ നടത്തി. പിന്നാലെ ദിയാൻഷുവിനെ വെള്ളത്തിൽ നിന്ന് പുറത്തെടുത്തെങ്കിലും ജീവൻ രക്ഷിക്കാനായില്ല. മൃതദേഹം പിന്നീട് ആശുപത്രിയിലേക്ക് മാറ്റി.
അതേസമയം, അപകടം നടന്ന പാറമട പ്രദേശം പ്രവേശനം നിരോധിച്ചിട്ടുള്ള അപകടമേഖലയാണെന്ന വിവരവും പുറത്തുവന്നിട്ടുണ്ട്. മഴക്കാലത്ത് വെള്ളം കുത്തനെ ഉയരുകയും ആഴം കൃത്യമായി മനസിലാക്കാനാകാത്ത സാഹചര്യം നിലനിൽക്കുകയും ചെയ്യുന്നതിനാൽ പ്രദേശത്ത് മുമ്പും അപകടസാധ്യത സംബന്ധിച്ച് മുന്നറിയിപ്പുകൾ നൽകിയിരുന്നുവെന്നാണ് നാട്ടുകാർ പറയുന്നത്.
ദിയാൻഷുവിന്റെ അപ്രതീക്ഷിത മരണം പരസ്യ ചിത്രീകരണ മേഖലയെയും കുടുംബാംഗങ്ങളെയും ഒരുപോലെ ദുഃഖത്തിലാഴ്ത്തി. സംഭവത്തിൽ പെരുമ്പാവൂർ പൊലീസ് അന്വേഷണം ആരംഭിച്ചിട്ടുണ്ട്.
