തിരുവനന്തപുരം: 2026-ലെ എഴുത്തച്ഛൻ പുരസ്കാരം പ്രശസ്ത സാഹിത്യകാരൻ മേതിൽ രാധാകൃഷ്ണന്. മലയാള സാഹിത്യത്തിന് നൽകിയ സമഗ്ര സംഭാവനകൾ പരിഗണിച്ചാണ് സംസ്ഥാന സർക്കാരിന്റെ പരമോന്നത സാഹിത്യ പുരസ്കാരത്തിന് അദ്ദേഹത്തെ തിരഞ്ഞെടുത്തത്.
അഞ്ച് ലക്ഷം രൂപയും പ്രശസ്തിപത്രവും ഫലകവും അടങ്ങുന്നതാണ് പുരസ്കാരം.
കവി കെ.ജി. ശങ്കരപ്പിള്ള അധ്യക്ഷനായ ജൂറിയാണ് പുരസ്കാര ജേതാവിനെ തിരഞ്ഞെടുത്തത്. കൽപ്പറ്റ നാരായണൻ, കെ. സച്ചിദാനന്ദൻ, സാറാ ജോസഫ് എന്നിവർ ജൂറി അംഗങ്ങളായിരുന്നു.
ശാസ്ത്രം, തത്വചിന്ത, മനഃശാസ്ത്രം തുടങ്ങിയ വിജ്ഞാന മേഖലകളെ തനതായ ലാവണ്യബോധത്തോടെ സാഹിത്യത്തിൽ സമന്വയിപ്പിച്ച എഴുത്തുകാരനാണ് മേതിൽ രാധാകൃഷ്ണനെന്ന് ജൂറി വിലയിരുത്തി.
സൂര്യവംശം, ബ്രാ, ചുവന്ന വിദൂഷകരുടെ അഞ്ചാം പത്തി, ഹിച്ച്‌കോക്കിന്റെ ഇടപെടൽഎന്നിവയാണ് അദ്ദേഹത്തിന്റെ പ്രധാന നോവലുകൾ. ഡിലൻ തോമസിന്റെ പന്ത്, സംഗീതം ഒരു സമയകലയാണ്, നായകന്മാർ ശവപേടകങ്ങളിൽ തുടങ്ങിയവ ശ്രദ്ധേയമായ കഥാസമാഹാരങ്ങളാണ്.
2025-ൽ മാതൃഭൂമി സാഹിത്യപുരസ്കാരവും മേതിൽ രാധാകൃഷ്ണന് ലഭിച്ചിരുന്നു. മലയാള സാഹിത്യത്തിലെ വേറിട്ട രചനാശൈലിയും ചിന്താപരമായ ആഴവും കൊണ്ട് ശ്രദ്ധേയനായ അദ്ദേഹത്തിന് എഴുത്തച്ഛൻ പുരസ്കാരം ലഭിച്ചത് സാഹിത്യലോകത്തിന് അഭിമാനകരമായ നേട്ടമാണ്.
