ഇർകുത്സ്ക്: റഷ്യയിലെ സൈബീരിയയിൽ പ്ലേഗ് ഗവേഷണ സ്ഥാപനത്തിലെ 28കാരിയായ ലാബ് ടെക്നീഷ്യൻ ന്യൂമോണിയ ബാധിച്ച് മരിച്ചതിനെ തുടർന്ന് ഷെലെഖോവ് ആശുപത്രിയിൽ ക്വാറന്റീൻ ഏർപ്പെടുത്തി. ഇർകുത്സ്ക് ആന്റി-പ്ലേഗ് റിസർച്ച് ഇൻസ്റ്റിറ്റ്യൂട്ടിലെ ജീവനക്കാരിയായ ദാര്യ ഷിപിലോവയാണ് ഒക്ടോബർ രണ്ടിന് ഷെലെഖോവിലെ ആശുപത്രിയിൽ മരിച്ചത്. മരണകാരണം ഇതുവരെ വ്യക്തമായിട്ടില്ല.

റഷ്യൻ ആരോഗ്യ നിരീക്ഷണ ഏജൻസിയായ റോസ്‌പോട്രെബ്‌നാഡ്‌സോർ നടത്തിയ പരിശോധനകളിൽ ലാബിൽ രോഗാണുക്കളുമായി ബന്ധപ്പെട്ട അപകടമോ മറ്റേതെങ്കിലും ലാബ് അപകടമോ നടന്നതായി തെളിവുകളും ലഭിച്ചിട്ടില്ല. രോഗബാധിതയുമായി സമ്പർക്കത്തിലുണ്ടായിരുന്ന ചിലരിൽ സാധാരണ ജലദോഷത്തിന് കാരണമാകുന്ന റൈനോവൈറസും ചിലരിൽ കോവിഡ്-19ഉം കണ്ടെത്തിയിട്ടുണ്ട്.

അതേസമയം, മുൻകരുതൽ നടപടികളുടെ ഭാഗമായി നിരവധി പേരെ വൈദ്യനിരീക്ഷണത്തിലാക്കി. ഇർകുത്സ്കിലെ ആന്റി-പ്ലേഗ് ഇൻസ്റ്റിറ്റ്യൂട്ടിലെ 60ലേറെ ജീവനക്കാരെ ഐസൊലേഷനിൽ പാർപ്പിച്ചതായും വിവിധ ആശുപത്രികളിൽ നിയന്ത്രണങ്ങൾ ഏർപ്പെടുത്തിയതായും റിപ്പോർട്ടുകളുണ്ട്. ഷെലെഖോവ് ആശുപത്രിയിൽ രോഗികളെ പ്രവേശിപ്പിക്കുന്നതും ഡിസ്ചാർജ് ചെയ്യുന്നതും താൽക്കാലികമായി നിർത്തിയിട്ടുണ്ട്.

ഇതിനിടെ, യുവതി ലാബിൽ ജോലി ചെയ്യുന്നതിനിടെ ന്യൂമോണിക് പ്ലേഗ് ബാക്ടീരിയ അടങ്ങിയ ടെസ്റ്റ് ട്യൂബ് പൊട്ടിയതിനെ തുടർന്ന് രോഗബാധിതയായെന്ന റിപ്പോർട്ടുകൾ റഷ്യൻ മാധ്യമങ്ങളിൽ പ്രചരിച്ചു. എന്നാൽ ഈ വാദം റഷ്യൻ അധികൃതർ സ്ഥിരീകരിച്ചിട്ടില്ല. പ്രാദേശിക രാഷ്ട്രീയ നേതാക്കളുടെ ചില ആദ്യകാല പ്രസ്താവനകളിലും പ്ലേഗ് സംബന്ധിച്ച പരാമർശങ്ങൾ ഉണ്ടായിരുന്നെങ്കിലും പിന്നീട് അവ തിരുത്തുകയോ ‘സാധ്യത’ മാത്രമായി വ്യക്തമാക്കുകയോ ചെയ്തു.

അമേരിക്കയും സംഭവവികാസങ്ങൾ സൂക്ഷ്മമായി നിരീക്ഷിക്കുകയാണ്. അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോ സ്ഥിതിഗതികൾ നിരീക്ഷിച്ചുവരികയാണെന്നും ഇപ്പോൾ പരിഭ്രാന്തിക്ക് കാരണമില്ലെങ്കിലും ശ്രദ്ധയോടെ തുടർനിരീക്ഷണം ആവശ്യമാണെന്നും പറഞ്ഞു. ലോകാരോഗ്യ സംഘടനയും റഷ്യൻ അധികൃതരുമായി വിവരങ്ങൾ ശേഖരിക്കുന്നതിനായി ബന്ധപ്പെടുന്നുണ്ട്. ലഭ്യമായ വിവരങ്ങളുടെ അടിസ്ഥാനത്തിൽ പൊതുജനാരോഗ്യത്തിന് നിലവിലെ അപകടസാധ്യത കുറവാണെന്നാണ് ലോകാരോഗ്യ സംഘടനയുടെ പ്രാഥമിക വിലയിരുത്തൽ.

അതിനിടെ, അഭ്യൂഹങ്ങളെയും സ്ഥിരീകരിക്കാത്ത വിവരങ്ങളെയും ആശ്രയിക്കരുതെന്നും റോസ്‌പോട്രെബ്‌നാഡ്‌സോറിന്റെ ഔദ്യോഗിക വിവരങ്ങൾ മാത്രം പിന്തുടരണമെന്നും റഷ്യൻ അധികൃതർ ആവശ്യപ്പെട്ടു. രോഗബാധയുടെ യഥാർത്ഥ കാരണം കണ്ടെത്തുന്നതിനുള്ള പരിശോധനകൾ തുടരുകയാണ്.