ന്യൂഡൽഹി: ഗുരുതരാവസ്ഥയിലുള്ള രോഗികൾക്ക് അതിവേഗ മസ്തിഷ്ക പരിശോധന സാധ്യമാക്കുന്ന ഇന്ത്യയിലെ ആദ്യ പോർട്ടബിൾ ബെഡ്സൈഡ് മാഗ്നറ്റിക് റെസൊണൻസ് ഇമേജിംഗ് (MRI) സംവിധാനം ഡൽഹി എയിംസ് ആശുപത്രിയിൽ പ്രവർത്തനം ആരംഭിച്ചു. ഐസിയു, എമർജൻസി വിഭാഗങ്ങൾ, ന്യൂറോസർജറി പരിചരണം എന്നിവയിൽ കഴിയുന്ന രോഗികൾക്ക് കിടക്കയ്ക്കരികിൽ തന്നെ മസ്തിഷ്ക സ്കാൻ നടത്താൻ കഴിയുന്നതാണ് ഈ സംവിധാനത്തിന്റെ പ്രധാന പ്രത്യേകത.
അൾട്രാ-ലോ-ഫീൽഡ് സാങ്കേതികവിദ്യയിലുള്ള ഈ പോർട്ടബിൾ എംആർഐ ഉപകരണം പ്രത്യേക എംആർഐ മുറികളുടെ ആവശ്യമില്ലാതെ നേരിട്ട് രോഗിയിലേക്ക് എത്തിക്കാനാകും. ഗുരുതരാവസ്ഥയിലുള്ള രോഗികളെ സ്കാനിംഗിനായി മാറ്റിപ്പാർപ്പിക്കേണ്ട സാഹചര്യം ഇതിലൂടെ ഒഴിവാകുന്നതും ചികിത്സാ സുരക്ഷ വർധിപ്പിക്കുന്നതുമാണ്.
എയിംസിലെ സെന്റർ ഫോർ ന്യൂറോളജിക്കൽ കണ്ടീഷൻസ് വിഭാഗത്തിൽ ഇതിനകം തന്നെ ഈ സംവിധാനം ഉപയോഗിച്ചുതുടങ്ങിയിട്ടുണ്ട്. സ്ട്രോക്ക്, തലച്ചോറിൽ ഉണ്ടാകുന്ന പരിക്ക് , ഐസിയു നിരീക്ഷണം, കുട്ടികളുടെ ന്യൂറോ പരിചരണം, ശസ്ത്രക്രിയാനന്തര ന്യൂറോസർജിക്കൽ ചികിത്സ തുടങ്ങിയ മേഖലകളിൽ വേഗത്തിലുള്ള രോഗനിർണയത്തിന് ഇത് സഹായകരമാകുമെന്നാണ് പ്രതീക്ഷ.
ഇന്ത്യയിൽ ആവശ്യമായ നിയന്ത്രണാനുമതികൾ ലഭിച്ചതിന് പിന്നാലെയാണ് സംവിധാനം സ്ഥാപിച്ചത്. റേഡിയോസർജറി ഗ്ലോബലിന്റെ പിന്തുണയോടെയാണ് പദ്ധതി നടപ്പാക്കിയത്. രാജ്യത്ത് പോയിന്റ്-ഓഫ്-കെയർ ന്യൂറോഡയഗ്നോസ്റ്റിക്സ് രംഗത്തെ ഗവേഷണത്തിനും ഗ്രാമീണ പ്രദേശങ്ങളിലേക്കുള്ള മസ്തിഷ്ക പരിശോധനാ സേവനങ്ങളുടെ വ്യാപനത്തിനും ഈ സാങ്കേതികവിദ്യ വലിയ പിന്തുണയാകുമെന്ന് അധികൃതർ അറിയിച്ചു.
