ന്യൂഡൽഹി: ഇൻഷുറൻസ് പോളിസികളുടെ തെറ്റായ വിൽപ്പന (മിസ്-സെല്ലിംഗ്) തടയാനും ഉപഭോക്തൃ സംരക്ഷണം ശക്തിപ്പെടുത്താനും ഇൻഷുറൻസ് റെഗുലേറ്ററി ആൻഡ് ഡെവലപ്മെന്റ് അതോറിറ്റി ഓഫ് ഇന്ത്യ (ഐആർഡിഎഐ) ചെയർമാൻ അജയ് സേത്ത് പുതിയ പരിഷ്കാര നിർദേശങ്ങൾ മുന്നോട്ടുവച്ചു. ഓരോ ഇൻഷുറൻസ് പോളിസി വിൽപ്പനയും അതിന് പിന്നിലെ വ്യക്തിഗത പോയിന്റ് ഓഫ് സെയിൽസ് (POS) ജീവനക്കാരനിലേക്കോ ഏജന്റിലേക്കോ സെയിൽസ് പ്രതിനിധിയിലേക്കോ നേരിട്ട് ബന്ധിപ്പിക്കാൻ കഴിയുന്ന ‘പബ്ലിക് ഇൻഷുറൻസ് രജിസ്ട്രി’ രൂപീകരിക്കണമെന്നാണ് പ്രധാന നിർദേശം.
നിലവിൽ പോളിസി വിൽപ്പനയുടെ ഉത്തരവാദിത്വം ബാങ്കുകൾ, ബ്രോക്കർമാർ തുടങ്ങിയ ഇടനില സ്ഥാപനങ്ങളിലേക്കാണ് കൂടുതലായും ചൂണ്ടിക്കാണിക്കപ്പെടുന്നത്. പുതിയ സംവിധാനം നിലവിൽ വന്നാൽ, പോളിസി വിറ്റ വ്യക്തിയെ വരെ കൃത്യമായി തിരിച്ചറിയാൻ കഴിയുകയും ഉത്തരവാദിത്തം വ്യക്തതയാർജിക്കുകയും ചെയ്യും.
ലൈഫ് ഇൻഷുറൻസ് മേഖലയിലെ തെറ്റായ വില്പന പരാതികൾ വർധിച്ചുവരുന്ന സാഹചര്യത്തിലാണ് ഈ നീക്കം. 2024-25 സാമ്പത്തിക വർഷത്തിൽ ലൈഫ് ഇൻഷുറൻസ് പരാതികൾ മുൻവർഷത്തേക്കാൾ 14 ശതമാനം ഉയർന്ന് 26,667 ആയി. ആകെ ഇൻഷുറൻസ് പരാതികളിൽ 22 ശതമാനവും ലൈഫ് ഇൻഷുറൻസ് മേഖലയിലേതാണ്. ഉയർന്ന വിൽപ്പന പ്രോത്സാഹനങ്ങളും ഉപഭോക്താവിന് അനുയോജ്യമല്ലാത്ത ഉൽപ്പന്നങ്ങൾ ശുപാർശ ചെയ്യുന്നതുമാണ് പരാതികൾ വർധിക്കാൻ പ്രധാന കാരണങ്ങളെന്ന് വിലയിരുത്തപ്പെടുന്നു.
ഇതിനുപുറമെ, പോയിന്റ് ഓഫ് സെയിൽസ് ജീവനക്കാരെ നിയമിക്കുന്നതിന് കൂടുതൽ കർശനമായ പശ്ചാത്തല പരിശോധന, ജോലി മാറിയാലും അവരുടെ മുൻകാല വിൽപ്പന ചരിത്രം ദൃശ്യമാക്കുന്ന സംവിധാനം, വിൽപ്പനയുടെ എണ്ണം മാത്രമല്ല ഗുണനിലവാരവും ഉപഭോക്തൃ സംതൃപ്തിയും അടിസ്ഥാനമാക്കിയുള്ള പ്രോത്സാഹന പദ്ധതി എന്നിവയും ഐആർഡിഎഐ നിർദേശിച്ചിട്ടുണ്ട്.
ഓൺലൈൻ ഇൻഷുറൻസ് പ്ലാറ്റ്ഫോമുകളിൽ ഉപഭോക്താക്കളെ തെറ്റിദ്ധരിപ്പിക്കുന്ന ‘ഡാർക്ക് പാറ്റേണുകൾ’ പൂർണമായും ഒഴിവാക്കണമെന്നും റെഗുലേറ്റർ ആവശ്യപ്പെട്ടിട്ടുണ്ട്. ഈ പരിഷ്കാരങ്ങൾ നടപ്പിലാകുന്നതോടെ ഇൻഷുറൻസ് മേഖലയിലെ സുതാര്യതയും ഉത്തരവാദിത്തവും വർധിക്കുകയും ഉപഭോക്താക്കൾക്ക് കൂടുതൽ സുരക്ഷിതവും വിശ്വാസയോഗ്യവുമായി സേവനം ലഭ്യമാകുമെന്നും പ്രതീക്ഷിക്കുന്നു.
