പിതാവും ദീർഘകാല ഏജന്റുമായ ജോർജ് മെസ്സിയുടെ മരണവാർത്തയ്ക്ക് പിന്നാലെ ലയണൽ മെസ്സി കുടുംബത്തോടൊപ്പം അർജന്റീനയിലെ റൊസാരിയോയിലെത്തി. പങ്കാളി അന്റോണെല റൊക്കൂസോയ്ക്കും മക്കൾക്കുമൊപ്പമാണ് മെസ്സി ജന്മനഗരമായ റൊസാരിയോയിൽ എത്തിയത്. 68-ാം വയസ്സിലാണ് ജോർജ് മെസ്സി അന്തരിച്ചത്.
ആഴ്ചകളായി ചികിത്സയിലായിരുന്ന ജോർജ് മെസ്സിയുടെ ആരോഗ്യനില സംബന്ധിച്ച വിവരങ്ങൾ നേരത്തെ പുറത്തുവന്നിരുന്നു. കുടുംബത്തിന്റെ സ്ഥിരീകരണത്തിന് പിന്നാലെയാണ് മരണം ഔദ്യോഗികമായി അറിയിച്ചത്. റൊസാരിയോയിൽ അദ്ദേഹത്തിന്റെ സ്വകാര്യ അനുസ്മരണ ചടങ്ങുകൾ നടക്കുകയാണ്. പിന്നീട് മൃതദേഹം നഗരത്തിന് സമീപമുള്ള എൽ പ്രാഡോ സെമിത്തേരിയിലേക്ക് മാറ്റുമെന്നാണ് റിപ്പോർട്ടുകൾ.
മെസ്സിയുടെ കരിയറിൽ നിർണായക പങ്കുവഹിച്ച വ്യക്തിയായിരുന്നു ജോർജ് മെസ്സി. മുൻ മെറ്റൽ ഫാക്ടറി തൊഴിലാളിയും യുവ ഫുട്ബോൾ പരിശീലകനുമായിരുന്ന അദ്ദേഹം 2000-ൽ 13 വയസ്സുകാരനായ ലയണലിനൊപ്പം ബാഴ്സലോണയിലേക്ക് പോയിരുന്നു. പിന്നീട് മകന്റെ കരിയറിലെ കരാറുകളും മറ്റ് പ്രൊഫഷണൽ കാര്യങ്ങളും കൈകാര്യം ചെയ്ത ദീർഘകാല ഏജന്റായി അദ്ദേഹം പ്രവർത്തിച്ചു.
ബാഴ്സലോണ, പാരിസ് സെന്റ് ജെർമെയ്ൻ, ഇന്റർ മയാമി തുടങ്ങിയ ക്ലബുകളിലേക്കുള്ള മെസ്സിയുടെ കരിയർ നീക്കങ്ങളിലും ജോർജിന് നിർണായക പങ്കുണ്ടായിരുന്നു. മകന്റെ ഫുട്ബോൾ ജീവിതത്തിന്റെ തുടക്കം മുതൽ അവസാനഘട്ടം വരെയും ഒപ്പമുണ്ടായിരുന്ന പിതാവിന്റെ വേർപാട് മെസ്സിക്ക് വലിയ വ്യക്തിപരമായ നഷ്ടമാണ്.
ജോർജ് മെസ്സിയുടെ മരണത്തിൽ ന്യൂവെൽസ് ഓൾഡ് ബോയ്സ്, അർജന്റീന ഫുട്ബോൾ അസോസിയേഷൻ, കോൺമെബോൾ തുടങ്ങിയവ അനുശോചനം രേഖപ്പെടുത്തി. മെസ്സിയുടെ ബാല്യകാലവും ഫുട്ബോൾ വളർച്ചയും ബന്ധപ്പെട്ട റൊസാരിയോയിൽ അദ്ദേഹത്തിന്റെ വരവ് ആരാധകരുടെയും ഫുട്ബോൾ ലോകത്തിന്റെയും ശ്രദ്ധ നേടി.
