നടി മഞ്ജു വാര്യർ സംവിധായകൻ സനൽ കുമാർ ശശിധരനെതിരെ മാനനഷ്ടക്കേസ് ഫയൽ ചെയ്തു. സാമൂഹിക മാധ്യമങ്ങളിലൂടെ തനിക്കെതിരെ നിരന്തരം അപവാദപ്രചാരണങ്ങളും അപകീർത്തികരമായ പരാമർശങ്ങളും നടത്തുന്നുവെന്ന് ചൂണ്ടിക്കാട്ടിയാണ് എറണാകുളം മുൻസിഫ് കോടതിയെ മഞ്ജു വാര്യർ സമീപിച്ചത്.
സംവിധായകൻ സനൽ കുമാർ ശശിധരനെ ഒന്നാം പ്രതിയാക്കിയും യൂട്യൂബറും മാധ്യമപ്രവർത്തകനുമായ ഷാജൻ സ്കറിയയെ രണ്ടാം പ്രതിയാക്കിയും ആണ് ഹർജി നൽകിയിരിക്കുന്നത്. ഫേസ്ബുക്ക് ഉൾപ്പെടെയുള്ള സാമൂഹിക മാധ്യമങ്ങളിൽ തനിക്കെതിരെ പങ്കുവെച്ചിട്ടുള്ള അപകീർത്തികരമായ പോസ്റ്റുകൾ നീക്കം ചെയ്യണമെന്നും ഭാവിയിൽ ഇത്തരം പരാമർശങ്ങൾ നടത്തുന്നത് തടയണമെന്നും ഹർജിയിൽ ആവശ്യപ്പെട്ടു.
ഹർജി പരിഗണിച്ച കോടതി, മഞ്ജു വാര്യർക്കെതിരെ അപകീർത്തികരമായ പോസ്റ്റുകൾ പ്രസിദ്ധീകരിക്കുന്നതിൽ നിന്ന് സനൽ കുമാർ ശശിധരനെ വിലക്കി ഇടക്കാല ഉത്തരവ് പുറപ്പെടുവിച്ചു. വിവാദ പോസ്റ്റുകൾ നീക്കം ചെയ്യുന്നതുമായി ബന്ധപ്പെട്ട് സാമൂഹിക മാധ്യമ കമ്പനിയായ മെറ്റയ്ക്കും കോടതി നോട്ടീസ് അയച്ചു.
മഞ്ജു വാര്യർ ചില മാഫിയകളുടെയും സെക്സ് റാക്കറ്റുകളുടെയും നിയന്ത്രണത്തിലാണെന്നും അവരുടെ ജീവന് ഭീഷണിയുണ്ടെന്നും ആരോപിച്ച് സനൽ കുമാർ ശശിധരൻ അടുത്തിടെ സെക്രട്ടേറിയറ്റിന് മുന്നിൽ അനിശ്ചിതകാല നിരാഹാര സമരം നടത്തിയിരുന്നു. ഈ ആരോപണങ്ങൾ അടിസ്ഥാനരഹിതവും തനിക്ക് മാനഹാനിയുണ്ടാക്കുന്നതുമാണെന്ന് ചൂണ്ടിക്കാട്ടിയാണ് മഞ്ജു വാര്യർ നിയമനടപടിയിലേക്ക് നീങ്ങിയിരിക്കുന്നത്.
കേസ് നവംബർ അഞ്ചിന് കോടതി വീണ്ടും പരിഗണിക്കും.
