തൊടുപുഴ: ലഹരി വിമുക്ത കേരളം എന്ന ലക്ഷ്യത്തോടെ ആഭ്യന്തര വകുപ്പും കേരള പൊലീസും സംയുക്തമായി നടപ്പാക്കുന്ന ‘ഓപ്പറേഷൻ തൂഫാൻ – ദ നാർക്കോ ഹണ്ട്’ പദ്ധതിക്ക് പിന്തുണ പ്രഖ്യാപിച്ച് നടൻ മോഹൻലാലും രമേശ് ചെന്നിത്തലയും തൊടുപുഴയിൽ കൂടിക്കാഴ്ച നടത്തി. പദ്ധതിയുടെ പ്രചാരണ പ്രവർത്തനങ്ങളിൽ സജീവമായി പങ്കാളിയാകുമെന്ന് മോഹൻലാൽ അറിയിച്ചു.

പദ്ധതിയുടെ ഭാഗമായി ‘I AM A TOOFAN WARRIOR’ എന്ന് രേഖപ്പെടുത്തിയ പ്രത്യേക ബാഡ്ജ് ആഭ്യന്തര മന്ത്രി രമേശ് ചെന്നിത്തല മോഹൻലാലിന് സമ്മാനിച്ചു. ലഹരിവിരുദ്ധ സന്ദേശം സമൂഹത്തിന്റെ എല്ലാ തലങ്ങളിലേക്കും എത്തിക്കുന്നതിനായി മോഹൻലാൽ മുന്നിൽ നിന്ന് പ്രവർത്തിക്കുമെന്നും അധികൃതർ അറിയിച്ചു.

കൂടിക്കാഴ്ചയിൽ, മോഹൻലാലിന്റെ നേതൃത്വത്തിൽ പ്രവർത്തിക്കുന്ന വിശ്വശാന്തി ഫൗണ്ടേഷൻ ലഹരിക്കെതിരെ നടപ്പാക്കുന്ന വിവിധ പദ്ധതികളുടെ വിശദാംശങ്ങൾ അദ്ദേഹം മന്ത്രിക്ക് കൈമാറി. കേരള പൊലീസിന്റെ ലഹരിവിരുദ്ധ പ്രവർത്തനങ്ങളുമായി സഹകരിച്ച് പ്രവർത്തിക്കാൻ താൻ പൂർണമായും തയ്യാറാണെന്നും മോഹൻലാൽ വ്യക്തമാക്കി.

‘ഓപ്പറേഷൻ തൂഫാൻ’ രാഷ്ട്രീയ ഭേദമന്യേ സമൂഹത്തിലെ എല്ലാ വിഭാഗങ്ങളെയും പങ്കാളികളാക്കുന്ന വലിയ ജനകീയ മുന്നേറ്റമാണെന്ന് മോഹൻലാൽ അഭിപ്രായപ്പെട്ടു. ലഹരിക്കെതിരായ പോരാട്ടത്തിൽ പൊതുസമൂഹത്തിന്റെ സജീവ പങ്കാളിത്തം അനിവാര്യമാണെന്നും അദ്ദേഹം ചൂണ്ടിക്കാട്ടി. കൂടിക്കാഴ്ചയുടെ വീഡിയോ മോഹൻലാൽ തന്റെ ഔദ്യോഗിക ഫേസ്ബുക്ക് പേജിലൂടെ പങ്കുവെച്ചിട്ടുണ്ട്.

കേരളത്തെ ലഹരി വിമുക്തമാക്കുന്നതിനുള്ള ബോധവത്കരണ പ്രവർത്തനങ്ങൾക്ക് കൂടുതൽ ജനപിന്തുണ നേടാൻ മോഹൻലാലിന്റെ പങ്കാളിത്തം സഹായകരമാകുമെന്നാണ് ആഭ്യന്തര വകുപ്പിന്റെ വിലയിരുത്തൽ.