ഓണം പ്രമാണിച്ച് യാത്രക്കാരുടെ അധിക തിരക്ക് പരിഹരിക്കാൻ ചാർലപള്ളി–കോട്ടയം റൂട്ടിൽ പ്രത്യേക ട്രെയിൻ സർവീസുകൾ പ്രഖ്യാപിച്ചു. ദക്ഷിണ റെയിൽവേയുടെ തിരുവനന്തപുരം ഡിവിഷൻ അറിയിപ്പുപ്രകാരം, 07197/07198 നമ്പർ ട്രെയിനുകളാണ് മൂന്ന് വീതം സർവീസുകൾ നടത്തുക.

ചാർലപള്ളി–കോട്ടയം എക്സ്പ്രസ് സ്പെഷ്യൽ (07197) ആഗസ്റ്റ് 16, 23, 30 തീയതികളിൽ ഞായറാഴ്ച രാവിലെ 7.15ന് ചാർലപള്ളിയിൽ നിന്ന് പുറപ്പെടും. അടുത്ത ദിവസം രാവിലെ 12.25ന് കോട്ടയത്ത് എത്തും.

മടക്ക സർവീസായ കോട്ടയം–ചാർലപള്ളി എക്സ്പ്രസ് സ്പെഷ്യൽ (07198) ആഗസ്റ്റ് 17, 24, 31 തീയതികളിൽ തിങ്കളാഴ്ച വൈകിട്ട് 4.45ന് കോട്ടയത്ത് നിന്ന് പുറപ്പെടും. മൂന്നാം ദിവസം പുലർച്ചെ 12.30ന് ചാർലപള്ളിയിൽ എത്തും.

നൽഗൊണ്ട, മിര്യാലഗുഡ, ഗുണ്ടൂർ, തേനാലി, ബാപ്ട്ല, ചിറാല, ഒംഗോൾ, നെല്ലൂർ, രേണിഗുണ്ട, കാട്പാടി, ജോലാർപേട്ട, സേലം, ഈറോഡ്, തിരുപ്പൂർ, പോടനൂർ, പാലക്കാട്, തൃശൂർ, ആലുവ, എറണാകുളം ടൗൺ തുടങ്ങിയ സ്റ്റേഷനുകളിൽ ട്രെയിനിന് സ്റ്റോപ്പുണ്ടാകും.

ട്രെയിനിൽ 3 എസി ടു ടയർ, 5 എസി ത്രീ ടയർ, 10 സ്ലീപ്പർ ക്ലാസ്, 4 ജനറൽ സെക്കൻഡ് ക്ലാസ് കോച്ചുകൾ, രണ്ട് ലഗേജ് കം ബ്രേക്ക് വാനുകൾ എന്നിവ ഉൾപ്പെടെ ആകെ 24 കോച്ചുകളുണ്ടാകും.

പ്രത്യേക ട്രെയിനുകളുടെ അഡ്വാൻസ് റിസർവേഷൻ ഓഗസ്റ്റ് 14ന് ഉച്ചയ്ക്ക് 2.15ന് ആരംഭിക്കും. ട്രെയിൻ സമയക്രമവും സ്റ്റോപ്പേജുകളുടെ പൂർണ വിവരങ്ങളും ഇന്ത്യൻ റെയിൽവേയുടെ വെബ്സൈറ്റിലും NTES ആപ്പിലും ലഭ്യമാകും.

ഓണം അവധിക്കാലത്ത് കേരളത്തിലേക്കും തിരിച്ചുമുള്ള യാത്രക്കാരുടെ തിരക്ക് കണക്കിലെടുത്താണ് പ്രത്യേക സർവീസുകൾ ഏർപ്പെടുത്തിയിരിക്കുന്നത്.