ഓണക്കാലത്തെ യാത്രാ തിരക്ക് കണക്കിലെടുത്ത് എറണാകുളം ജംഗ്ഷനും ബെംഗളൂരുവിലെ എസ്എംവിടി (SMVT) സ്റ്റേഷനും തമ്മിൽ പ്രത്യേക പ്രതിവാര എക്സ്പ്രസ് ട്രെയിനുകൾ പ്രഖ്യാപിച്ച് ദക്ഷിണ റെയിൽവേ. ഓഗസ്റ്റ്, സെപ്റ്റംബർ മാസങ്ങളിലായി അഞ്ച് സർവീസുകൾ വീതമാണ് ഇരു ദിശകളിലും സർവീസ് നടത്തുക.
ട്രെയിൻ നമ്പർ 06147 എറണാകുളം ജംഗ്ഷൻ–എസ്എംവിടി
ബെംഗളൂരു വീക്ക്ലി എക്സ്പ്രസ് സ്പെഷ്യൽ ഓഗസ്റ്റ് 9, 16, 23, 30, സെപ്റ്റംബർ 6 എന്നീ ഞായറാഴ്ചകളിൽ രാത്രി 11.10-ന് എറണാകുളം ജംഗ്ഷനിൽ നിന്ന് പുറപ്പെടും. ട്രെയിൻ അടുത്ത ദിവസം ഉച്ചയ്ക്ക് 12.45-ന് എസ്എംവിടി
ബെംഗളൂരുവിൽ എത്തിച്ചേരും. ആകെ അഞ്ച് സർവീസുകളാണ് ഈ റൂട്ടിൽ നടത്തുക.
മടക്കയാത്രയിൽ ട്രെയിൻ നമ്പർ 06148 എസ്എംവിടി ബെംഗളൂരു–എറണാകുളം ജംഗ്ഷൻ വീക്ക്ലി എക്സ്പ്രസ് സ്പെഷ്യൽ ഓഗസ്റ്റ് 10, 17, 24, 31, സെപ്റ്റംബർ 7 എന്നീ തിങ്കളാഴ്ചകളിൽ വൈകിട്ട് 4.00-ന് ബെംഗളൂരുവിൽ നിന്ന് പുറപ്പെടും. അടുത്ത ദിവസം പുലർച്ചെ 5.45-ന് എറണാകുളം ജംഗ്ഷനിൽ എത്തിച്ചേരും. ഈ റൂട്ടിലും അഞ്ച് സർവീസുകളാണ് ക്രമീകരിച്ചിരിക്കുന്നത്.
ഓണക്കാലത്ത് കേരളത്തിൽ നിന്ന് ബെംഗളൂരുവിലേക്കും തിരിച്ചുമുള്ള യാത്രക്കാരുടെ തിരക്ക് കുറയ്ക്കുന്നതിനും അധിക സീറ്റുകൾ ലഭ്യമാക്കുന്നതിനുമാണ് പ്രത്യേക ട്രെയിനുകൾ ഏർപ്പെടുത്തിയിരിക്കുന്നതെന്ന് ദക്ഷിണ റെയിൽവേ അറിയിച്ചു. യാത്രക്കാർ മുൻകൂട്ടി ടിക്കറ്റ് ബുക്ക് ചെയ്ത് യാത്ര ആസൂത്രണം ചെയ്യണമെന്നും റെയിൽവേ അഭ്യർഥിച്ചു.
